RCB Win WPL 2024 : ट्रॉफी ताफ्यात आली रे...! बंगळुरू चॅम्पियन झाल्यानंतर विराट कोहलीने स्मृतीला केला व्हिडिओ कॉल

Virat Kohli Congratulate Smriti Mandhana on Video Call : रॉयल चॅलेंजर्स बंगळुरूची फ्रेंचायझी आणि चाहत्यांसाठी आजचा दिवस खूप खास आहे. आरसीबीने आज 16 वर्षाचा विजेतेपदाचा दुष्काळ संपला आहे. आयपीएलच्या 16 हंगामात विराट कोहली आरसीबीसाठी जे करू शकला नाही ते स्मृती मंधानाने दुसऱ्याच हंगामात करून दाखवले. स्मृती मानधनाने आरसीबीला महिला प्रीमियर लीगचे विजेतेपद मिळवून दिले. अंतिम सामन्यात बंगळुरूने दिल्लीचा 8 गडी राखून पराभव केला.

महिला प्रीमियर लीगच्या अंतिम सामन्यात प्रथम खेळताना दिल्ली कॅपिटल्सने रॉयल चॅलेंजर्स बंगळुरूला 114 धावांचे लक्ष्य दिले होते, जे स्मृती मानधनाच्या संघाने 3 चेंडू बाकी असताना केवळ दोन गडी गमावून सहज गाठले. बंगळुरू चॅम्पियन झाल्यानंतर विराट कोहलीने स्मृती मानधनाला व्हिडिओ कॉल करून जिंकल्याबद्दल अभिनंदन केले. आरसीबीसाठी मंधानाने 31 धावा, सोफी डिव्हाईनने 32 धावा आणि एलिस पेरीने नाबाद 35 धावा केल्या.

आरसीबीने आयपीएलमध्ये आत्तापर्यंत सात कर्णधारांना आजमावले आहे, पण एकही कर्णधार त्यांना ट्रॉफी जिंकू देऊ शकला नाही. या कर्णधारांमध्ये विराट कोहली, राहुल द्रविड, केविन पीटरसन आणि फाफ डू प्लेसिस यांचा समावेश आहे. WPL च्या लीग टप्प्यात RCB ने 4 सामने जिंकले आणि 8 गुणांसह तिसऱ्या स्थानावर राहून प्लेऑफसाठी पात्र ठरले. एलिमिनेटरमध्ये त्याने मुंबई इंडियन्सचा पराभव करून अंतिम फेरीत धडक मारली.