WPL Harmanpreet Kaur : खुद्द कर्णधार हरमनप्रीतच म्हणते गतविजेत्या मुंबई इंडियन्समोर यंदा मोठं आव्हान

WPL 2024 Harmanpreet Kaur Mumbai Indians : मुंबई, ता. 16 - वेगवेगळ्या परिस्थितीशी मिळतेजुळते घेणे महिला प्रीमियर लीगचे विजेतेपद राखताना महत्त्वाचे ठरणार आहे, असे मत मुंबई इंडियन्सची कर्णधार हरमनप्रीत कौरने व्यक्त केले. यंदाची स्पर्धा २३ फेब्रुवारी ते १७ मार्चदरम्यान होत असून दिल्ली आणि बंगळूर येथेच सामने होणार आहेत.

पहिल्यावहिल्या महिला प्रीमियर लीगमध्ये गतवर्षी मुंबई इंडियन्सने विजेतेपद मिळवले होते. मुंबईचा संघ अजून ताकदवर झाल्यामुळे यंदाही त्यांचा दबदबा राहण्याची शक्यता आहे.

बंगळूरमधीच्या चिन्नास्वामी स्टेडियमची खेळपट्टी मुंबईपेक्षा वेगळी आहे; तसेच हवामानातही फरक आहे. दिल्लीत खेळण्याचा मला फारसा अनुभव नाही. त्यामुळे आम्हाला तेथील परिस्थितीशी मिळतेजुळते घ्यावे लागेल, असे हरमनप्रीत आज झालेल्या पत्रकार परिषदेत म्हणाली.

गतविजेते असल्यामुळे आम्हाला या वेळी फार काही वेगळे करण्याची गरज नाही. गतवर्षी केलेला सकारात्मक विचार आणि खेळ करण्याबरोबर आम्ही दडपणरहित मानसिकता बाळगणार आहोत, असे हरमनप्रीत म्हणाली.

आम्ही एकमेकांच्या यशात सहभागी होतो आणि एकमेकांना सांभाळून घेतो, ही मुंबई इंडियन्स संघाची संस्कृती आहे, असे हरमनप्रीतने आवर्जून सांगितले.

(Sports Latest News)