Ranji Trophy Ruturaj Gaikwad : ऋतुराज गायकवाडची झुंजार खेळी, महाराष्ट्राचा डाव सावरला मात्र...

Ranji Trophy 2024 Ruturaj Gaikwad : बाद फेरीत पोहोचण्याच्या आशा संपुष्टात आलेल्या महाराष्ट्राच्या क्रिकेट संघाला रणजी क्रिकेट करंडकातील अ गटातील अखेरच्या साखळी फेरीच्या लढतीत ठसा उमटवता आला नाही. सेनादलविरुद्ध खेळताना त्यांचा पहिला डाव २२५ धावांवर आटोपला. मात्र स्टार खेळाडू ॠतुराज गायकवाड याने ९६ धावांची झुंजार खेळी करताना आपली चुणूक दाखवली. सेनादलने पहिल्या दिवसअखेरीस बिनबाद २७ धावा केल्या असून आता त्यांचा संघ १९८ धावांनी पिछाडीवर आहे.

महाराष्ट्राने नाणेफेक जिंकून प्रथम फलंदाजी करण्याचा निर्णय घेतला. मात्र वरूण चौधरीच्या भेदक गोलंदाजीसमोर महाराष्ट्राच्या फलंदाजांचा निभाव लागला नाही. अर्शिन कुलकर्णी (२ धावा), मुर्तझा ट्रंकवाला (६ धावा), अंकित बावणे (४ धावा), कौशल तांबे (०) यांच्याकडून निराशा झाली. महाराष्ट्राची अवस्था ४ बाद १९ धावा अशी बिकट झाली.

ॠतुराज गायकवाड व दिग्विजय पाटील या जोडीने ९४ धावांची भागीदारी करीत महाराष्ट्राचा डाव सावरला. पण पुलकित नारंगच्या गोलंदाजीवर दिग्विजय पाटील ४२ धावांवर बाद झाला आणि जोडी तुटली. ॠतुराज गायकवाड याने १६१ चेंडूंमध्ये ९ चौकार व एक षटकारासह ९६ धावांची खेळी केली. मात्र त्याचे शतक हुकले. अर्जुन शर्माच्या गोलंदाजीवर तो बाद झाला. महाराष्ट्राचा पहिला डाव २२५ धावांवर आटोपला.

सेनादलकडून अर्जुन शर्मा याने ५९ धावा देत महाराष्ट्राचा निम्मा संघ गारद केला. वरुण चौधरी याने ३९ धावा देत चार फलंदाजांना पॅव्हेलियनचा रस्ता दाखवला. त्यानंतर सेनादलने पहिल्या दिवसअखेरीस पहिल्या डावात बिनबाद २७ धावा केल्या असून शुभम रोहिला १४ धावांवर, तर नितिन तन्वर ९ धावांवर खेळत आहे.

संक्षिप्त धावफलक : महाराष्ट्र - पहिला डाव २२५ धावा (ॠतुराज गायकवाड ९६ - १६१ चेंडू, ९ चौकार, १ षटकार, दिग्विजय पाटील ४२, तरणजीत ढिल्लो ३४, अर्जुन शर्मा ५/५९, वरुण चौधरी ४/३९) वि. सेनादल बिनबाद २७ धावा (शुभम रोहिला खेळत आहे १४, नितिन तन्वर खेळत आहे ९).

(Sports Latest News)