वूमन्स प्रीमियर लीग २०२५ स्पर्धेतील ९ वा सामना अत्यंत रोमांचक झाला. बंगळुरुला झालेल्या या सामन्यात युपी वॉरियर्सने सुपर ओव्हरमध्ये रॉयल चॅलेंजर्स बंगळुरूविरुद्ध थरारक विजय मिळवला. युपी वॉरियर्सच्या विजयात सोफी इक्लेस्टोनने फलंदाजी आणि गोलंदाजी, अशा दोन्ही विभागात योगदान देत मोलाचा वाटा उचलला. तीच युपीच्या विजयाची शिल्पकारही ठरली.
या सामन्यात बंगळुरुने प्रथम फलंदाजी करताना निर्धारित २० षटकात ६ बाद १८० धावा करत युपीसमोर विजयासाठी १८१ धावांचे लक्ष्य ठेवले होते. या लक्ष्याचा पाठलाग करताना २० षटकात युपीलाही सर्वबाद १८० धावाच करता आल्या. त्यामुळे सामन्यात बरोबरी झाली. यामुळे वूमन्स प्रीमियर लीगमध्ये पहिल्यांदाच सुपर ओव्हर खेळवण्यात आली.