FIFA World Cup 2022 : कोल्हापूरचा फुटबॉल हंगाम लांबणीवर

कोल्हापूर : अवघ्या काही दिवसांवर आलेला कोल्हापूरचा फुटबॉल हंगाम लांबणीवर पडला आहे. २०२२ - २३ साठीच्या फुटबॉल हंगामाबाबत सुपर सिनियर ८ व सिनियर ८ संघाचे पदाधिकारी व कोल्हापूर स्पोर्ट्स असोसिएशन पदाधिकरी यांच्यामध्ये बैठक झाली.

कोल्हापूरच्या फुटबॉल हंगामाची सर्वजण डोळ्यात तेल घालून वाट बघत आहेत. अशातच परदेशी खेळाडू व देशातील नामवंत खेळाडू यंदाच्या हंगामामध्ये आपली चुणूक दाखवणार आहेत. यामुळे नेमका हंगाम कधी सुरु होणार, याकडे फुटबॉल प्रेमींचे लक्ष लागून राहिले आहे. अशातच केएसएकडून चार डिसेंबरपासून फुटबॉल हंगाम सुरु होणार असल्याचे पत्रक जारी करण्यात आले. मैदान खेळण्यायोग्य करण्याची तयारी देखील सुरु झाली; मात्र आज अध्यक्ष मालोजीराजे छत्रपती यांच्या अध्यक्षतेखाली १६ संघांच्या पदाधिकाऱ्यांसमवेत बैठक झाली. डिसेंबरमध्ये होणाऱ्या विद्यापीठस्तरीय विभागीय व आंतरविभागीय स्पर्धा मिरज येथे होत आहेत. यासाठी काही खेळाडू सहभागी होत आहेत.

यामुळे यंदाचा कोल्हापूरच्या फुटबॉल हंगामाची तारीख बदलण्याचा निर्णय चर्चेनंतर घेण्यात आला आहे. हंगाम १० डिसेंबरपासून सुरु करण्यात येणार असल्याचे प्राथमिक स्तरावर ठरले आहे. या निर्णयामुळे लाखो रुपये गुंतवलेल्या संघ व्यवस्थापनाला पुढील नियोजनाचा प्रश्न पडला आहे. त्याचवेळी फुटबॉल प्रेमींना आणखीन काही दिवस वाट पाहावी लागणार आहे.

दरम्यान, कोल्हापूरमध्ये संतोष ट्रॉफी फुटबॉल स्पर्धेचे काही सामने होणार आहेत. यासाठी ७ जानेवारी ते १५ जानेवारी दरम्यान मैदान राखीव ठेवावे लागणार आहे. राष्ट्रीय पातळीवरील स्पर्धा होत असल्याने यासाठीचे नेटके नियोजन देखील करण्यासाठी प्रयत्न केले जात आहेत.

के. एस. ए. लीग सुरु झाल्यापासून अंतिम सामन्यासाठी किमान ४० दिवस लागतात; मात्र हंगाम उशिरा सुरु झाल्याने विविध तांत्रिक कारणामुळे लीग स्पर्धाना मोठा हाफ टाइम घ्यावा लागणार आहे.