Fifa world cup 2022 Neymar : नेमारच्या पुनरागमनाचा प्रशिक्षक टीटे यांना विश्वास

दोहा : ब्राझीलच्या आक्रमक फळीतून खेळणारा नेमार सर्बियाविरुद्धच्या सामन्यात घोट्याला झालेल्या दुखापतीमुळे लढत अर्धवट सोडून बाहेर बाकावर बसला होता. तो ग गटातील ब्राझीलच्या उर्वरित सामन्यांना मुकणार हे जवळपास निश्चित आहे. तरी नेमार ब्राझीलचे बाद फेरीतील सामने खेळेल असा आत्मविश्वास संघाचे मुख्य प्रशिक्षक टीटे यांनी बोलून दाखवला आहे. तर नेमारवर २४ तास फिजिओथेरपी करण्यात आली आहे आणि आता तो दुखापतीमधून सावरत आहे असा विश्वास ब्राझीलच्या बचावफळीतून खेळणाऱ्या मार्किनहोस याने व्यक्त केला आहे.

‘‘सर्बियाविरुद्धाच्या सामन्यात निकोला मिलेंकोविचला धडकल्याने नेमारच्या घोट्याला दुखापत झाली होती. ही दुखापत झाली तरी तो काही वेळ मैदानावर होता. मला आणि संघातील खेळाडूंपैकी कोणालाच त्याच्या दुखापतीबद्दल जास्त काही माहिती नव्हते. परंतु तो ज्या क्षणी मैदानावर वेदना असहाय्य झाल्यामुळे पडला , त्या क्षणी नेमारला आम्ही बाकावर बसवण्याचे ठरवले. आमच्या बचावफळीतून खेळणाऱ्या डॅनिलोस हा सुद्धा दुखापतग्रस्त असून ; हे दोघेही ब्राझीलच्या संघाचे विश्वकरंडकाच्या बादफेरीमध्ये प्रतिनिधित्व करतील अशी ग्वाही आहे,’’ असे टिटे आज स्वित्झर्लंड विरुद्धच्या सामन्याअगोदर म्हटले.

नेमारच्या दुखापतीबद्दल तो स्वतःच अधिक माहिती देऊ शकेल. आम्ही त्याच्या आणि डॅनिलोसच्या दुखापतीवर फक्त लक्ष ठेवून आहोत आणि संघाच्या डॉक्टरांना जी काही मदत लागत आहे ती करत आहोत असेही टीटे पुढे म्हणाले. तर मार्किनहोस याने नेमार यंदाचा फुटबॉल विश्वकरंडक उंचावण्यास तयार असून ; त्याच्याशी बोलताना ही स्पर्धा जिंकण्याची भूक त्याच्यात शिल्लक असल्याचे दिसत आहे , असे मत व्यक्त केले आहे.