जगासमोर बोलण्याची भीती; नाओमीची फ्रेंच ओपनमधून माघार

पॅरिस - जपानची स्टार टेनिसपटू नाओमी ओसाका हिने फ्रेंच ओपनमधून माघार घेतली आहे. पहिल्याच सामन्यानंतर नाओमीवर दंडात्मक कारवाई झाली होती. सामन्यानंतर माध्यमांसमोर बोलण्यास नकार दिल्यानं नाओमीला 15 हजार डॉलर्सचा दंड केला होता. या दंडात्मक कारवाईनंतर आपण फ्रेंच ओपनमधून माघार घेतली आहे. पहिल्या फेरीत नाओमीने विजय मिळवला आहे. दंडाची रक्कम तिच्या बक्षिसातून कपात करण्यात येणार आहे.

फ्रेंच ओपनमधून माघार घेतल्यानंतर नाओमीने म्हटलं की, 'पहिल्या फेरीत जिंकल्यानंतर पत्रकार परिषदेत न गेल्याबद्दल 15 हजार अमेरिकन डॉलर इतका दंड करण्यात आला. त्यानंतर स्पर्धेतून माघार घेत आहे. मी काही पब्लिक स्पीकर नाही. जगाच्या माध्यमांसमोर बोलण्याआधी मला खूप भीती वाटते.'

ओसाकाने ट्विटरवरून सांगितलं की, खरंतर मी 2018 मध्ये झालेल्या अमेरिकन ओपनपासून मानसिक तणावाखाली आहे. तेव्हापासून मानसिक तणावातून बाहेर पडण्यासाठी मला खूप धडपड करावी लागत आहे. पॅरिसमध्ये आधीपासूनच मला असुरक्षित वाटत होतं. त्यामुळे मी विचार केला की आपल्या चांगल्यासाठी पत्रकार परिषद सोडणं चांगलं. मी याची घोषणा आधीच केली होती कारण मला वाटतं की, या नियमाचा काही भाग हा जुना आहे आणि त्याकडे लक्ष वेधायचे होते.

ओसाकाने स्पर्धेपूर्वीच मीडियासमोर न बोलण्याचा पवित्रा घेतला होता. पहिल्या सामन्यानंतर ती आपल्या मतावर ठाम राहिली. जगातील सर्वाधिक कमाई करणाऱ्या महिला टेनिसपटूने बुधवारी ट्विटच्या माध्यमातून आपली भूमिका स्पष्ट केली होती. या भूमिकेमुळे माझ्यावर जी दंडात्मक कारवाई केली जाईल ती रक्कम चॅरिटीला देईन, असे तिने म्हटले होते. यंदाच्या फ्रेंच ओपन स्पर्धेत नावोमी ओसाकाने दमदार सुरुवात केली होती. तिने 63 व्या मानांकित पॅट्रिसिया मारिया टिग हिला 6-4, 7-6 असे सरळ सेटमध्ये पराभूत केले.