BCCIचा महिला संघाशी भेदभाव! लंकेविरूद्धच्या सामन्याचे प्रक्षेपण होणार नाही?

भारतीय महिला क्रिकेट संघ गुरुवारपासून श्रीलंका दौऱ्यावर तीन सामन्यांची टी-२० मालिका खेळणार आहे. त्यानंतर वनडे मालिका खेळवली जाणार आहे. बीसीसीआयकडून या मालिकेच्या थेट प्रसारणाबाबतची परिस्थिती स्पष्ट नाही. श्रीलंका पहिल्या सामन्याचे थेट प्रक्षेपण क्रिकेटच्या अधिकृत यूट्यूब चॅनेलवर करणार आहे. मात्र ही मालिका भारतात प्रसारित करण्याबाबत बीसीसीआयकडून कोणतीही व्यवस्था करण्यात आलेली नाही. कर्णधार हरमनप्रीत कौरनेही भारत आणि श्रीलंका यांच्यातील टी-20 मालिका सूरू होण्याआधी तिने आपले मत मांडले आहे.

पत्रकार परिषदेत हरमनप्रीत कौर म्हणाली, मी मालिकेच्या टेलिकास्टबद्दल काही गोष्टी ऐकल्या आहे. मात्र बोर्डाकडून अद्याप कोणतीही अधिकृत माहिती मिळालेली नाही. मला वाटते शेवटच्या क्षणापर्यंत यावर काहीतरी केले जाईल. या मालिकेच्या प्रसारणाबाबत बीसीसीआय शेवटच्या क्षणी नक्कीच काहीतरी पाऊल उचलेल, असा विश्वास त्यांनी व्यक्त केला.

भारतीय संघात अनेक अव्वल फलंदाज आहेत आणि भारताची कर्णधार हरमनप्रीत कौर हिने म्हटले आहे की, गुरुवारपासून श्रीलंकेविरुद्ध सुरू होणाऱ्या T20 मालिकेत सर्वांना स्वतःला सिद्ध करण्याची संधी मिळेल. डावखुरा फलंदाज स्मृती मानधना, आक्रमक फलंदाज शेफाली वर्मा, साभिनेनी मेघना आणि यास्तिका भाटिया हे भारताच्या १५ जणांच्या संघात अव्वल फळीतील फलंदाज आहेत. स्मृतीच्या अनुपस्थितीत शेफाली आणि यस्तिकाने फेब्रुवारीमध्ये न्यूझीलंडविरुद्ध डावाची सुरुवात केली होती.