VIDEO : साउदीच्या उसळत्या चेंडूवर विराट गडबडला!

ICC World Test Championship Final भारत आणि न्यूझीलंड यांच्यातील मेगा फायनल लढत आता राखीव दिवसांपर्यंत जाऊन पोहचली आहे. पाऊस आणि अंधूक प्रकाशाच्या खेळानंतर न्यूझीलंडचा पहिला डाव 249 धावांत संपुष्टात आला. भारतीय संघाने दुसऱ्या डावाला सुरुवात केली असून शुभमन गिल आणि रोहित शर्माच्या रुपात टीम इंडियाने दोन विकेट्सही गमावल्या आहेत. दोन्ही सलामीवीरांना साउदीने तंबूचा रस्ता दाखवला. रोहित शर्मा बाद झाल्यानंतर कर्णधार विराट कोहली मैदानात आला. त्याला भेदक मारा करत साउदीने त्याचे स्वागत केले.

टीम इंडियाच्या दुसऱ्या डावातील 27 व्या षटकातील साउदीचा अखेरचा चेंडू विराट कोहलीने निर्धाव खेळून काढला. 29 व्या षटकात साउदी गोलंदाजी करत असताना कोहली स्ट्राईकवर होता. पहिल्या तीन चेंडूवर साउदीने कोहलीला आउट स्विंगने हैराण केले. त्यानंतर चौथ्या चेंडूवर साउदीने कोहलीला बाउन्सर मारला. हा चेंडू सोडताना कोहली चुकला. बॉल हेल्मेटवर लागला आणि भारतीय संघाच्या धावफलकात बाईजच्या रुपात चार धावा जमा झाल्या. त्याच्या पुढच्या चेंडूवर विराट कोहलीने तीन धावा घेतल्याचे पाहायला मिळाले. साउदीचा भेदक माऱ्यासमोर टीम इंडिच्या फलंदाजांना कुठेतरी संघर्ष करावा लागतोय, असेच चित्र पाहायला मिळाले.

राखीव दिवसात विराट आणि साउदी यांच्यातील सामना रंगतदार होण्याचे संकेतच पाचव्या दिवशीच्या खेळात मिळाले आहेत. या सामन्यापूर्वी 11 डावात विराटने साउदीचा सामना करताना 120 धावा केल्या आहेत. यात तीन वेळा साउदीने त्याला बाद केले आहे. त्यामुळे आता मेगा फायनलच्या राखीव दिवशी कोण भारी ठरणार हे पाहणे महत्त्वाचे ठरेल.