IND vs AUS: दिग्गज खेळाडूचा मोठा खुलासा! राहुलच्या जागी हा असेल टीम इंडियाचा उपकर्णधार

India vs Australia 3rd Test : रवींद्र जडेजा सध्या जबरदस्त फॉर्ममध्ये असून त्याला भारतीय कसोटी संघाचा उपकर्णधार करण्यात यावे असे मत भारताचे माजी दिग्गज फिरकी गोलंदाज हरभजन सिंगने व्यक्त केले आहे. ऑस्ट्रेलियाविरुद्धच्या उर्वरित दोन कसोटी सामन्यांसाठी केएल राहुलला उपकर्णधारपदावरून दूर करण्यात आले असून ही जागा रिकामी आहे.

उपकर्णधारपदासाठी जडेजाचे नाव सुचवताना हरभजन सिंग म्हणाला, ‘‘ सध्या सुरु असणाऱ्या बोर्डर-गावसकर करंडकामधील पहिले दोन सामने झाले आहेत. या दोन्ही सामन्यात उपकर्णधार असलेल्या राहुलला धावा करता आलेल्या नाहीत. त्याउलट मात्र रवींद्र जडेजाने गोलंदाजी करताना आपली छाप पाडली आहे. तसेच भारतीय संघाला गरज पडली तेव्हा त्याने धावा सुद्धा केल्या आहेत.

भारतीय क्रिकेट संघाच्या वरिष्ठ निवड समितीने आता इंदूर आणि अहमदाबाद येथे होणाऱ्या तिसऱ्या आणि चौथ्या कसोटी सामन्यासाठी राहुलला उपकर्णधारपदावरून दूर केले आहे. राहुल गेले कित्येक सामने धावा करू शकत नसल्यामुळे तो राष्ट्रीय संघामध्ये असेलच असे नाही. त्यामुळे जो खेळाडू अंतिम ११ जणांमध्ये निश्चित असेल, त्यालाच संघाचे उपकर्णधार करण्यात यावे.

रवींद्र जडेजा सध्या अष्टपैलू कामगिरी करत आहे. जडेजा एक अनुभवी खेळाडू आहे. त्यामुळे त्याला कठीण परिस्थितीत कसा खेळ करायचा हे चांगले माहिती आहे. इतकेच नव्हे तर त्याला भारतीय कसोटी संघाबरोबरच आणि एकदिवसीय संघाचे सुद्धा उपकर्णधार करण्यात यावे असे सुद्धा हरभजन पुढे म्हणतो.

गुडघ्याला झालेल्या दुखापतीमुळे जडेजा जवळपास पाच महिने क्रिकेटपासून दूर होता. मागच्या वर्षी झालेल्या आशियाई क्रिकेट करंडकादरम्यान जडेला दुखापत झाली होती. त्यामुळे तो ऑस्ट्रेलियामध्ये झालेल्या ट्वेंटी-२० विश्वकरंडक स्पर्धेमध्ये सुद्धा खेळू शकला नव्हता. मात्र त्याने क्रिकेट खेळायची कोणत्याच प्रकारे घाई केली नाही आणि रणजी स्पर्धेमध्ये सौराष्ट्राच्या संघाकडून मैदानावर पुनरागमन केले.

सध्या सुरू असणाऱ्या बोर्डर- गावसकर करंडकामध्ये जडेजाने गोलंदाजी करताना ऑस्ट्रेलियाचे १७ फलंदाज बाद केले आहेत. तर संघाला गरज असताना त्याने चांगली खेळी करत ९६ धावा सुद्ध केल्या आहेत . तिसरा सामना इंदूरमध्ये १ मार्चपासून खेळविण्यात येणार आहे.