IND vs BAN 1st Test: भारताचा बांगलादेशवर 188 धावांनी विजय, मालिकेत 1-0 अशी आघाडी

India vs Bangladesh Score 1st Test Day 5 : भारताने बांगलादेश विरुद्धच्या दोन कसोटी सामन्यांच्या मालिकेतील पहिला सामना 188 धावांनी जिंकला आहे. या विजयासह टीम इंडियाने मालिकेत 1-0 अशी आघाडी घेतली आहे. या सामन्यात भारताकडून चेतेश्वर पुजारा, शुभमन गिल आणि कुलदीप यादव यांनी अप्रतिम कामगिरी केली. या मालिकेतील दुसरा सामना 22 डिसेंबरपासून सुरू होणार आहे.

कुलदीप यादवने बांगलादेशला नववा धक्का दिला आहे. त्याने इबादत हसनला श्रेयस अय्यरकरवी झेलबाद केले. इबादतने पाच चेंडूंचा सामना केला मात्र त्याला खाते उघडता आले नाही. कुलदीप यादवचे या डावातील हे तिसरे यश आहे.

बांगलादेशचे आठ फलंदाज पॅव्हेलियनमध्ये परतले आहेत. शाकिब अल हसनच्या रूपाने बांगलादेशला आठवा धक्का बसला. शाकिबने 108 चेंडूत 84 धावा केल्या. त्याच्या खेळीत सहा चौकार आणि सहा षटकारांचा समावेश होता.

बांगलादेशची सातवी विकेट पडली आहे. मोहम्मद सिराजने मेहदी हसनला बाद करून टीम इंडियाला सातवे यश मिळवून दिले आहे. उमेश यादवने त्याचा झेल टिपला.

चितगाव कसोटीत पाचव्या दिवसाचा खेळ सुरू झाला आहे. मोहम्मद सिराजने दिवसाचे पहिले षटक टाकले ज्यात पाच धावा झाल्या. बांगलादेशची धावसंख्या सध्या सहा विकेट्सवर 277 धावा आहे. शाकिब अल हसन 41 आणि मेहदी हसन मिराज 13 धावांवर खेळत आहेत.