IND vs NZ: ब्रेसवेलने टीम इंडियाच्या गोलंदाजांना इतकं धुतले की...! ठोकल्या 22 चेंडूत 108 धावा

Michael Bracewell : मायकल ब्रेसवेलने आपल्या आक्रमक फलंदाजीने टीम इंडियाला घाबरवले होते. भारत आणि न्यूझीलंड यांच्यातील 3 सामन्यांच्या वनडे मालिकेला कालपासून सुरुवात झाली. शुभमन गिलच्या द्विशतकाच्या जोरावर भारताने प्रथम खेळताना 8 बाद 349 धावांची मोठी धावसंख्या उभारली. प्रत्युत्तरात किवी संघाने 6 गडी गमावून 131 धावा केल्या.

अशा स्थितीत संघ लवकरच कोलमडणार असे वाटत होते. पण ब्रेसवेलने 78 चेंडूत 140 धावा करत सामना रोमांचक केला. त्याने मिचेल सँटनरसोबत 7व्या विकेटसाठी 102 चेंडूत 162 धावांची मोठी भागीदारी केली. अखेरीस 49.2 षटकांत 337 धावा करून संघ ऑलआऊट झाला. भारताने अवघ्या 12 धावांनी विजय मिळवला.(IND vs NZ 1st ODI Michael Bracewell Hits 2nd Century His ODI career)

31 वर्षीय मायकेल ब्रेसवेलचा हा केवळ 17 वा वनडे सामना आहे. त्याने आतापर्यंत 2 शतके झळकावली आहेत, एकही अर्धशतकही नाही. म्हणजेच जेव्हा जेव्हा त्याला संधी मिळते तेव्हा तो शतक झळकावतो. त्याने प्रथम श्रेणी क्रिकेट, लिस्ट-ए आणि टी-20 या तिन्ही फॉरमॅटमध्ये शतके झळकावली आहेत. यावरून त्याची उत्कृष्ट कामगिरी स्पष्ट होऊ शकते. या ऑफस्पिनरने आंतरराष्ट्रीय T20 मध्ये हॅटट्रिकही केली आहे. म्हणजेच चेंडूवरही तो चमत्कार करण्यात पटाईत आहे.

मायकल ब्रेसवेलने आपल्या डावात 78 चेंडूंचा सामना करत 140 धावा केल्या. यादरम्यान त्याने 12 चौकार आणि 10 षटकार मारले. म्हणजेच 108 धावा फक्त बाऊंड्रीवरून आल्या. भारताबद्दल बोलायचे झाले तर, वेगवान गोलंदाज मोहम्मद सिराजने पुन्हा एकदा चांगली कामगिरी केली. त्याने 10 षटकात 46 धावा देत 4 बळी घेतले. त्यात सँटनरच्या मोठ्या विकेटचाही समावेश आहे. त्यामुळे ब्रेसवेल आणि सँटनरची भागीदारी तुटली.