World Cup 2023 : नृत्य आणि गाण्याची मैफल स्टेडियममध्ये रंगणार

अहमदाबाद : विश्वकरंडक स्पर्धेच्या सलामीच्या सामन्याअगोदर नियोजित होत असलेला उद्‌घाटनाचा सामना ऐनवेळी रद्द करण्यात आला होता; मात्र यात नरेंद्र मोदी स्टेडियमवर उद्या भारत-पाक सामन्याच्या निमित्ताने करमणुकीचा कार्यक्रम होणार आहे; मात्र त्यासाठी प्रेक्षकांना दुपारीच मैदानात यावे लागेल आणि उन्हाचे चटके सहन करत हा कार्यक्रम पाहावा लागणार आहे.

अर्जित सिंग, सुखविंदर सिंग, सुनिधी चौहान, नेहा कक्कर आदी कलाकार आपली अदाकारी सादर करतील. त्याला शंकर महादेवन यांच्या सुरेल गीताची जोड असेल. शुक्रवारी या कार्यक्रमाची रंगीत तालीम पार पडली.

सामना दुपारी दोन वाजता सुरू होतो; पण ही भारत-पाक लढत असल्यामुळे सकाळी ११ वाजल्यापासून स्टेडियमच्या गेटवर गर्दी होणार आणि त्याअगोदर पासून स्टेडियमकडे येणारे सर्व रस्ते गर्दीने फुलून जाणार आहेत. मात्र सकाळीच घराबाहेर पडणाऱ्या प्रेक्षकांना रात्री उशिरापर्यंत स्टेडियममध्ये राहण्याचे परिश्रम करावे लागतील.