Ind vs WI: मालिका जिंकल्यानंतर धवन म्हणाला... 'हे' टीम इंडियाचे खरे हिरो

India vs West Indies 2nd Odi: टीम इंडिया आणि वेस्ट इंडिज यांच्यातील तीन एकदिवसीय सामन्यांच्या मालिकेतील दुसरा सामना पोर्ट ऑफ स्पेन येथे खेळला गेला. टीम इंडियाने या रोमांचक सामन्यात 2 चेंडू आणि 2 विकेट्स राखून शानदार विजय मिळवला. या विजयासह टीम इंडियाने मालिकेत 2-0 अशी आघाडी घेतली. अष्टपैलू अक्षर पटेल टीम इंडियाच्या विजयाचा हिरो ठरला. मालिका जिंकल्यानंतर कर्णधार शिखर धवन खूप आनंदी दिसला. धवनने युवा खेळाडूंचे मन भरून कौतुक केले.

शिखर धवनच्या नेतृत्वाखाली युवा टीम इंडिया वेस्ट इंडिज दौऱ्यावर गेली आहे. संघाने सलग दोन सामने जिंकून मालिकेत आघाडी घेतली आहे. दुसऱ्या सामन्यात विजयानंतर शिखर धवनने युवा टीम इंडियाचे जोरदार कौतुक केले. धवन म्हणाला, संघाने केलेली ही उत्कृष्ट कामगिरी होती. खेळाडूंनी त्यांचा आत्मविश्वास गमावला नाही हे आश्चर्यकारक होते. श्रेयस अय्यर, संजू सॅमसन, अक्षर पटेल या सर्वांनी उत्कृष्ट कामगिरी केली. आवेश खानने त्याच्या पदार्पणाच्या सामन्यात 10 महत्त्वपूर्ण धावा केल्या. डावाची सुरुवात आम्ही थोडी संथ केली. या सामन्यात अय्यर-सॅमसनच्या भागीदारीमुळे मोठा फरक पडला.

दुसऱ्या एकदिवसीय सामन्याबद्दल बोलायचं झालं तर, वेस्ट इंडिजचा कर्णधार निकोलस पूरनने नाणेफेक जिंकून प्रथम फलंदाजी करताना 50 षटकात 6 गडी गमावून 311 धावा केल्या. शाई होपने कारकिर्दीतील 100 वा वनडे खेळताना 115 धावा केल्या. निकोलस पूरनने 74 धावांची खेळी खेळली. भारताकडून शार्दुल ठाकूरने सर्वाधिक तीन बळी घेतले. आवेशचा हा डेब्यू वनडे होता आणि तो चांगलाच महागात पडला. त्याने 6 षटकात 54 धावा दिल्या.

भारतासमोर 312 धावांचे लक्ष्य होते, टीम इंडियाने 49.4 षटकांत 8 गडी गमावून विजयाचे लक्ष्य गाठले. टीम इंडियाकडून श्रेयस अय्यर 63 धावा, संजू सॅमसन 54 धावा आणि अक्षर पटेल 64* धावा केल्या. अक्षर पटेलला प्लेअर ऑफ द मॅचचा किताबही मिळाला.