PV Sindhu : माद्रिद ओपन बॅडमिंटन स्पर्धेत पी. व्ही. सिंधूचे आव्हान संपुष्टात

माद्रिद : भारताची शटलक्वीन पी. व्ही. सिंधू हिचे माद्रिद ओपन बॅडमिंटन स्पर्धेतील आव्हान शुक्रवारी संपुष्टात आले. थायलंडच्या सुपानिदा केटथाँग हिने सिंधूवर तीन गेममध्ये (२४-२६, २१-१७, २२-२०) रोमहर्षक विजय मिळवला आणि उपांत्य फेरीत प्रवेश केला.

पी. व्ही. सिंधू - सुपानिदा केटथाँग यांच्यामधील लढतीत पहिल्या गेममध्ये दोन्ही खेळाडूंमध्ये कडवी झुंज पाहायला मिळाली. सिंधूने अखेरच्या क्षणी आपला खेळ उंचावला आणि २६-२४ असा विजय मिळवत १-० अशी आघाडी घेतली.

थायलंडच्या खेळाडूने दुसऱ्या गेममध्ये झोकात पुनरागमन केले. हा गेम तिने २१-१७ असा जिंकत बरोबरी साधली. अखेरच्या गेममध्ये दोन्ही खेळाडूंमध्ये प्रत्येक गुणासाठी चुरस पाहायला मिळाली. मात्र सुपानिदा हिने हा गेम २२-२० असा आपल्या नावावर केला आणि पुढे पाऊल टाकले. सिंधूचा एक तास व १७ मिनिटांत पराभव झाला.