GT vs MI IPL 2023 : गुजरात फक्त मुंबईलाच असते टरकून; हेड टू हेडमध्ये रोहितच बाप

GT vs MI IPL 2023 Head To Head : आयपीएलच्या 16 व्या हंगामातील दुसऱ्या क्वालिफायर सामन्यात आज गतविजेते गुजरात टायटन्स आणि सर्वाधिकवेळा आयपीएल जिंकणारी टीम मुंबई इंडियन्स यांच्यात लढत होत आहे. अहमदाबादच्या नरेंद्र मोदी स्टेडियमवर होत असलेल्या या सामन्यात घरच्या मैदानावर खेळणाऱ्या गुजरातसमोर रोहितच्या मुंबई पल्टनचे कडवे आव्हान असणार आहे.

मुंबईने हार्दिक पांड्याचा भाऊ आणि मुंबई इंडियन्सचा माजी खेळाडू क्रुणाल पांड्याच्या नेतृत्वातील लखनौचा 81 धावांनी पराभव करत क्वालिफायरसाठी क्वालिफाय केले. त्यामुळे गुजरातने मुंबईला हलक्यात घेऊन चालणार नाही. दुसरं म्हणजे हेड टू हेडमध्येही मुंबई गुजरातसाठी डोकेदुखीच आहे.

GT vs MI हेड टू हेड

गेल्या वर्षी पदार्पणाचा हंगाम खेळणाऱ्या गुजरात आणि मुंबई इंडियन्स यांच्यात आयपीएलमध्ये आतापर्यंत 3 सामने झाले आहेत. यात रोहितच्या नेतृत्वातील मुंबईने दोन सामन्यात विजय मिळवला आहे. तर हार्दिकच्या नेतृत्वाखाली खेळणाऱ्या गुजरात टायटन्सला फक्त 1 सामना जिंकता आला आहे. गुजरात ही आयपीएलमधील सर्वात चांगली चेस करणारी टीम म्हणून ओळखली जाते. मात्र मुंबईसमोर या संघानेही चेस करताना नांगी टाकली होती. या हंगामात चेस करताना गुजरात मुंबईविरूद्ध हरली होती.

गुजरातला सूर्याचा धसका

गुजरात टायटन्ससाठी अफगाणिस्तानचा राशिद खान हा मधल्या षटकात चांगलाच प्रभावी ठरतोय. रोहित शर्मा आणि सूर्यकुमार यादव राशिद खानसमोर कशी फलंदाजी करतात हे पाहणे उत्सुकतेचे ठरणार आहे. राशिदने रोहितला आयपीएलमधील सहा डावात 4 वेळा बाद केले आहे. मात्र राशिद खानला सूर्यकुमार यादवला बाद करण्यात अपयश आले आहे. सूर्याने गेल्या सामन्यात गुजरातविरूद्ध 47 चेंडूत 67 धावा ठोकल्या होत्या.

(Sports Latest News)