IPL 2021 Points Table: कोलकाताचा मुंबई इंडियन्सला 'दे धक्का'

IPL 2021 Points Table after MI vs KKR: मुंबईविरूद्ध कोलकाताच्या युवा खेळाडूंनी अप्रतिम खेळी करत संघाला ७ गडी राखून विजय मिळवून दिला. प्रथम फलंदाजी करताना मुंबईच्या संघाने अनुभवी क्विंटन डी कॉकच्या अर्धशतकाच्या (५५) जोरावर १५५ धावा केल्या होत्या. या आव्हानात्मक लक्ष्याचा पाठलाग करताना KKRचा सलामीवीर शुबमन गिल स्वस्तात माघारी परतला. पण, व्यंकटेश अय्यरने ३० चेंडूत ५३ धावांची दमदार खेळी केली. अनुभवी राहुल त्रिपाठीनेही त्याला चांगली साथ दिली. राहुलने शेवटपर्यंत पिच न सोडता ४२ चेंडूत नाबाद ७४ धावा कुटल्या. कोलकाताच्या वादळी खेळीपुढे मुंबईच्या स्टार गोलंदाजांचाही धूळधाण उडाली. त्यामुळेच, नेट रनरेटच्या जोरावर KKRने मुंबईला खाली ढकलत Top 4 मध्ये प्रवेश केला. महत्त्वाची बाब म्हणजे, मुंबईचा मोठा पराभव झाल्याने त्यांना राजस्थानच्याही खाली सहाव्या स्थानावर विराजमान व्हावे लागले आहे.

पाहा कसं आहे सध्याचं Points Table

दरम्यान, नाणेफेक जिंकून कोलकाताच्या कॅप्टन मॉर्गनने प्रथम गोलंदाजी घेतली. रोहित शर्मा आणि क्विंटन डी कॉक जोडीने मुंबईला हवाई सुरूवात मिळवून दिली होती. पण रोहित बाद झाला आणि संघाच्या धावगतीला हळूहळू लगाम लागला. क्विंटन डी कॉकने आपलं अर्धशतक पूर्ण करत संघाला आव्हानात्मक धावसंख्या गाठून देण्यात मोलाचं योगदान दिलं. पण कोलकाताच्या फलंदाजांनी हे आव्हान सहज पार केलं. व्यंकटेश अय्यरने ५३ तर त्रिपाठीने नाबाद ७४ धावा केल्या. पण गोलंदाजीत कमाल दाखवत २० धावा देऊन १ बळी टिपणाऱ्या सुनील नारायणला सामनावीर घोषित करण्यात आले.