IPL 2022 : सिराजच्या अंगात शिरला रोनाल्डो; व्हिडिओ व्हायरल

आयपीएल स्पर्धेतील दुसऱ्या दिवशी रॉयल चॅलेंजर्स बंगळुरु आणि पंजाब किंग्ज (RCB vs PBKS) यांच्यातील सामन्यात धावांची बरसात झाल्याचे पाहायला मिळाले. पहिल्यांदा बॅटिंग करताना 200 पेक्षा अधिक धावा करुन रॉयल चॅलेंजर्स बंगळुरुच्या संघाला (Royal Challengers Bangalore ) पराभवाचा सामना करावा लागला. पहिल्यांदा फलंदाजी करताना आरसीबीने 2 बाद 205 धावा केल्या होत्या.. पंजाबने एक षटक राखून हे आव्हान परतवून लावले. या सामन्यानंतर रॉयल चॅलेंजर्स बंगळुरुचा गोलंदाज मोहम्‍मद सिराज (Mohammed Siraj) याचा एक व्हिडिओ सोशल मीडियावर व्हायरल होताना दिसतोय. काही नेटकरी त्याला ट्रोल करत असून त्याने विकेट मिळाल्यानंतर आनंद व्यक्त करताना केलेल्या सेलिब्रेशनचीही जोरदार चर्चा रंगली आहे.

हैदराबादकर सिराजने 14 व्या षटकात 2 चेंडूत 2 विकेट घेतल्या. या विकेट्स घेतल्यानंतर सिराजने लोकप्रिय फुटबॉलपटू रोनाल्‍डोच्या (Cristiano Ronaldo )स्टाइलमध्ये सेलिब्रेश केले. सिराजने पहिल्यांदा दमदार फलंदाजी करत असलेल्या भानुका राजपक्षेला आपले शिकार केले. त्यानंतर त्याने अंडर 19 वर्ल्‍ड कप स्‍टार राज बावाला तंबूचा रस्ता दाखवला. या दोन विकेट्स रॉयल चॅलेंजर्स बंगळुरुच्या ताफ्यात उत्साह निर्माण करणाऱ्या होत्या. पण अखेर पंजाबने त्यांच्यासमोर विजयी भांगडा केल्याचे पाहायला मिळाले.

पंजाबकडून शिखर धवन आणि भानुका यांनी प्रत्येकी 43- 43 धावा करत संघाच्या विजयात मोलाचा वाटा उचलला. ओडिन स्मिथने 8 चेंडूत नाबाद 25 धावा करत पंजाबच्या संघाला 19 व्या षटकातच विजय मिळवून दिला. आरसीबीकडून कर्णधार फाफ डु प्‍लेसीसने (Faf du Plessis )सर्वाधिक 88 धावांची खेली केली होती. त्याच्याशिवाय विराट कोहलीने नाबाद 41 धावा केल्या होत्या. दिनेश कार्तिकने 14 चेंडूत नाबाद 32 धावांची खेळी केली.