IPL 2023 : 'आधी तोंडावर नंतर पोटात... ' DC vs SRH सामन्यादरम्यान चाहत्यांमध्ये हाणामारी, व्हिडिओ व्हायरल

IPL 2023 DC vs SRH Fan Fight Video Viral : अरुण जेटली स्टेडियमवर शनिवारी सनरायझर्स हैदराबादने दिल्ली कॅपिटल्सचा नऊ धावांनी पराभव करत सामना जिंकला. मात्र या सामन्यादरम्यान स्टेडियममधील चाहत्यांमध्ये चुरशीची लढत पाहायला मिळाली.

चाहत्यांमधील हाणामारी कॅमेऱ्यात कैद झाली. यात कोणीही जखमी झाले नाही पण हाणामारी नेमकी कशामुळे झाली हे अद्याप समजू शकलेले नाही. आता व्हायरल होत असलेल्या क्लिपमध्ये खुर्च्या फेकल्या जात आहेत आणि आधी तोंडावर नंतर पोटात लाथा बुक्क्या मारल्या जात आहे खूप गोंधळ सुरू आहे.

सामन्याबद्दल बोलायचे झाल्यास मिचेल मार्शची अष्टपैलू कामगिरी (बॉलिंगसह 4-27 आणि 39 चेंडूत 63) व्यर्थ गेली कारण आयपीएल 2023च्या 40 क्रमांकाच्या सामन्यात सनरायझर्स हैदराबादने दिल्ली कॅपिटल्सचा नऊ धावांनी पराभव केला.

अभिषेक शर्माचा अष्टपैलू खेळ आणि शेवटच्या षटकात हेनरिक क्लासेनच्या आक्रमक फलंदाजीच्या जोरावर शनिवारी येथे झालेल्या इंडियन प्रीमियर लीग टी-20 सामन्यात सनरायझर्स हैदराबादने दिल्ली कॅपिटल्सचा नऊ धावांनी पराभव केला.

प्रथम फलंदाजी करताना सनरायझर्स हैदराबादने सलामीवीर अभिषेकच्या 36 चेंडूत 67 धावा आणि क्लासेनच्या 27 चेंडूत नाबाद 53 धावांच्या जोरावर 6 बाद 197 धावा केल्या. हैदराबादची जी चालू मोसमातील या मैदानावरील सर्वोच्च धावसंख्या आहे. संघाकडून अब्दुल समदने 21 चेंडूत 1 चौकार आणि दोन षटकारांच्या मदतीने 28 धावा केल्या.

मिचेल मार्शचा अष्टपैलू खेळ आणि फिल सॉल्टसोबत दुसऱ्या विकेटसाठी 66 चेंडूत 112 धावांची भागीदारी दिल्ली संघासाठी अपुरी ठरली आणि संघाला 20 षटकांत सहा गडी गमावून 188 धावाच करता आल्या.