इशानला फॉर्ममध्ये परतण्यासाठी 'या' तीन क्रिकेटपटूंनी केली मदत

IPL 2021 MI vs RR: राजस्थान विरूद्ध झालेल्या 'करो या मरो'च्या सामन्यात मुंबईच्या संघाने एकतर्फी खेळ करत सामना जिंकला. राजस्थान संघाकडून सलामीवीर एव्हिन लुईसने झटपट २४ धावांची खेळी केली होती. पण त्यानंतर कोणत्याही फलंदाजाला चांगली कामगिरी करता आली नाही. त्यामुळे त्यांना केवळ ९० धावांपर्यंतच मजल मारता आली. हे सोपे आव्हान मुंबईच्या संघाने २ गड्यांच्या बदल्यात सहज पार केले. गेले काही सामने फॉर्मसाठी झगडत असलेल्या मुंबईच्या इशान किशनला राजस्थान विरूद्ध सूर गवसला. त्याने २५ चेंडूत नाबाद अर्धशतक ठोकले.

राजस्थानविरूद्धच्या सामन्यानंतर इशान किशनला त्याच्या खेळीबद्दल विचारण्यात आले. त्यावर तो म्हणाला, "संघात परतल्याचा मला नक्कीच आनंद झालाय. त्यातच मला काही धावा करता आल्या याचाही आनंद वाटतोय. जेव्हा आम्ही गोलंदाजी केली त्याचवेळी आम्हाला खेळपट्टीचा अंदाज आला होता. आम्हाला कल्पना होती की चेंडू बॅटवर नीट येत नाही. त्यामुळे सरळ बॅटने खेळत राहण्याचा एकमेव पर्याय आमच्याकडे होता. प्रत्येक खेळाडूच्या आयुष्यात चढउतार येतात. मी विराट कोहली, हार्दिक पांड्या आणि कायरन पोलार्ड या तिघांशी चर्चा केली होती. त्यामुळे माझा आत्मविश्वास दुणावला होता. आजचा विजय लक्षात ठेवून त्याच ऊर्जेने पुढचा सामना खेळणं हे आता आमच्यापुढे आव्हान आहे."

दरम्यान, इशान किशनने २५ चेंडूत झळकवलेल्या नाबाद अर्धशतकाच्या जोरावर मुंबई इंडियन्सने ७० चेंडू आणि ८ गडी राखून राजस्थानचा धुव्वा उडवला. मोठ्या फरकाने मिळवलेल्या विजयामुळे मुंबई इंडियन्सला आवश्यक असणाऱ्या नेट रनरेटमध्येही सुधारणा झाली. धावसंख्येचा पाठलाग करताना कर्णधार रोहित शर्मा (२२) आणि सूर्यकुमार यादव (१३) दोघे लवकर बाद झाले. पण इशानने संघाला विजय मिळवून दिला. त्याने ५ चौकार आणि ३ षटकार लगावले.