कोलकताला मोठा विजय आवश्यक, दोन पराभवांमुळे लखनौचाही कस लागणार

IPL 2022: सलग दोन पराभव झालेल्या; परंतु तिसऱ्या स्थानावर कायम असणाऱ्या लखनौचा आज सलग दोन विजयांसह प्लेऑफसाठी प्रयत्न करत असलेल्या कोलकताविरुद्ध सामना होत आहे. कोलकतासाठी ही लढत चांगल्या सरासरीने जिंकणे आवश्यक आहे.(KKR vs LSG IPL Today Match)

डी. वाय. पाटील स्टेडियमवर होणारा हा सामना दोन्ही संघांचा अखेरचा साखळी सामना आहे. लखनौचा संघ 16 गुणांसह तिसऱ्या स्थानावर आहे. सलग दोन पराभवामुळे त्यांना लय मिळवण्यासाठी आणि पहिल्या दोन संघात स्थान मिळवण्यासाठी कोणत्याही परिस्थितीत विजय आवश्यक आहेच.

के.एल. राहुलच्या नेतृत्वाखाली खेळणाऱ्या लखनौकडे संभाव्य विजेता संघ म्हणून सुरुवातीच्या सामन्यातील कामगिरीवरून पाहिले जात होते; परंतु गेल्या दोन सामन्यांत त्यांची प्रामुख्याने फलंदाजीतील कामगिरी खालावली. बाद फेरी खेळायची असेल आणि त्यातून अंतिम सामन्यापर्यंत प्रगती करायची असेल, तर त्यांना मोठी सुधारणा करावी लागणार आहे.