Mitchell Starc RCB vs KKR : एका चेंडूमागं मोजले 7.3 लाख तरी विकेटची पाटी मात्र कोरी... स्टार्कने हंगामाच्या सुरूवातीलाच दिलं टेन्शन

Mitchell Starc Challengers Bengaluru vs Kolkata Knight Riders : ऑस्ट्रेलियाचा डावखुरा वेगवान गोलंदाज मिचेल स्टार्कवर आयपीएल 2024 च्या लिलावात इतिहासातील सर्वात मोठी बोली लागली होती. कोलकाता नाईट रायडर्सने त्याला 24.75 कोटी रूपये खर्च करून आपल्या संघात घेतलं. त्यामुळे तो यंदाच्या हंगामात केकेआरकडून कशी कामगिरी करतो याकडे सर्वांचे लक्ष होते.

मात्र केकेआरचे आतापर्यंत दोन सामने झाले आहेत. एक होम ग्राऊंड इडन गार्डन आणि आज दुसरा सामना आरसीबीसोबत चिन्नास्वामी स्टेडियमवर होत आहे. या दोन्ही सामन्यात मिचेल स्टार्कला एकही विकेट घेता आलेली नाही. कॅलक्युलेशन करायचं झालंच तर स्टार्कने टाकलेला एक चेंडू हा 7.3 लाखाला पडत आहे. या गणिताने आतापर्यंत 350 लाख रूपये केकेआरने खर्च केलेत तरी स्टार्कला अजून एकही विकेट मिळवता आलेली नाही.

केकेआर आणि आरसीबी यांच्यातील सामन्यात मिचेल स्टार्क आणि विराट कोहली यांची जुगलबंदी पहायला मिळेल असा चाहत्यांचा अंदाज होता. मात्र मिचेल स्टार्क अजून काही फॉर्ममध्ये दिसलेला नाही. सनराईजर्स हैदराबादविरूद्धच्या सामन्यात मिचेल स्टार्कने 53 धावांची उधळण केली होती. आरसीबीविरूद्धच्या सामन्यात देखील या वर्ल्ड क्लास गोलंदाजाने 47 धावा दिल्या आहेत. दोन्ही सामन्यात त्याला एकही विकेट मिळवता आलेली नाही.

चिन्नास्वामी स्टेडियमवर स्टार्कचा पेसच त्याचा दुष्मन झाला आहे. विराट कोहली अन् दिनेश कार्तिकने स्टार्कच्या या वेगाचा वापर करून उत्तुंग असे षटकार मारले. स्टार्कच्या गुणवत्तेबाबत कोणाच्याही मनात शंका नाही. मात्र तो कधी फॉर्ममध्ये येणार हे काळच सांगेल.

(IPL Marathi News)