मीच माझा 'रोल मॉडेल', स्पीडस्टार उमरान मलिकने स्पष्टच सांगितले

IPL 2022 : सनराईजर्स हैदराबाजचा स्पीडस्टार उमरान मलिक (Umran Malik) यंदाच्या आयपीएल हंगामात आपल्या वेगामुळे चांगलाच चर्चेत आला आहे. तो सातत्याने 145 ते 150 किलोमिटर प्रती तास वेगाने गोलंदाजी करत फलंदाजाच्या मनात धडकी भरवत आहे. चर्चेचा विषय ठरलेल्या उमरान मलिकला भारतीय संघात स्थान द्या अशी मागणी आतापासूनच होत आहे. दरम्यान 22 वर्षाच्या या वेगावान गोलंदाजाने (Fast Bowler) एका मुलाखतीत सांगितले की त्याच्या गोलंदाजीतला वेग हा नैसर्गिक आहे. वेग प्राप्त करण्यासाठी त्याने कोणती विशेष गोष्ट केलेली नाही.

याच मुलाखतीत मलिकने त्याला इरफान पठाणने (Irfan Pathan) दिलेले मार्गदर्शन कसे कामी आले हे सांगितले. मलिक म्हणाला की मी यापूर्वी चेंडू टाकताना खूप आधी उडी मारत होतो. त्यामुळे चांगल्या लेंथवर गोलंदाजी करता येत नव्हती. मात्र इरफान पठाणच्या योग्य सल्ल्यामुळे मी आता माझी लाईन आणि लेंथ चांगलीच सुधारली आहे. मलिकने यंदाच्या हंगामात आतापर्यंत सहा सामने खेळले आहेत. त्यात त्याने 9 विकेट घेतल्या आहेत.

दरम्यान, मलिकने एनडीटीव्हीशी बोलताना सांगितले की, 'माझा वेग हा नैसर्गिक आहे. या वर्षी मी योग्य टप्यावर गोलंदाजी करण्याचा प्रयत्न करत आहे. मी नेहमीच वेगाने गोलंदाजी करत होतो. मीच माझा रोल मॉडेल (Role Model) आहे. ज्यावेळी इरफान पठाण आम्हाला कोचिंग करण्यासाठी आले त्यावेळी मी खूप आधी उडी मारून गोलंदाजी करत होतो. त्यामुळे माझ्या गोलंदाजीत सातत्य नव्हते. मात्र त्याने मला उडी कमी करण्यास सांगितले त्यानंतर मला योग्य लय सापडली. मला फक्त जम्मू काश्मीरचा (Jammu Kashmir) गौरव वाढवायचा आहे. मला देशाचा गौरव वाढवायचा आहे. मला फक्त चांगली कामगिरी करायची आहे.'