Suryakumar Yadav : सूर्याला झालंय तरी काय... आधी सोपा झेल सोडला नंतर भोपळा फोडण्यातही चुकला

Suryakumar Yadav IPL 2023 : भारताचा 360 डिग्री खेळाडू सूर्यकुमार यादवला यंदाच्या हंगामात लागलेलं ग्रहण दिवसेंदिवस जास्तच काळ लांबत चालले आहे. आज दिल्ली कॅपिटल्सविरूद्धचा सामना सूर्यासाठी सुरूवातीपासूनच फारसा चांगला गेला नाही. सूर्यकुमार यादव हा तसा सेफ फिल्डर म्हणून ओळखला जातो. मात्र आज त्याने सोपा झेल सोडला. याचबरोबर झेल सुटल्याने त्याच्या डोळ्याच्या जवळ दुखापत देखील झाली.

बर सूर्याचा बॅड टाईम इथंच थांबला नाही. मुंबईने दिल्लीचे 173 धावांचे आव्हान पार करताना आक्रमक सुरूवात केली. त्यानंतर मधल्या फेजमध्ये मुंबईची धावगती थोडी मंदावली. ज्यावेळी मुंबईला 30 चेंडूत विजयासाठी 50 धावांची गरज होती त्यावेळी तिलक वर्माने मुकेश कुमारच्या षटकात दोन षटकार आणि एक चौकार मारत 16 धावा वसूल केल्या. मात्र याच षटकात तिलक वर्मा तिसरा षटकार मारण्याच्या नादात बाद झाला.

तिलक वर्मा बाद झाल्यानंतर सूर्यकुमार यादव फलंदाजी करण्यासाठी आला. मुकेश कुमारने चेंडू लेग स्टम्पवर टाकत सूर्याला आयतं कोलीत दिलं होतं. मात्र तिथेही सूर्या चुकला. त्याला चेंडू सीमापार धाडता आला नाही. तो डीप स्क्वेअर लेगला झेल देऊन पहिल्याच चेंडूवर भोपळाही न फोडता माघारी फिरला. या पाठोपाठच्या दोन विकेट्सनी मुंबईसाठी सामना फसला. त्यातच रोहित शर्माही 45 चेंडूत 65 धावा करून बाद झाला.