IPL 2022: फाफ ड्युप्लेसिसच्या कॅप्टन्सीबाबत 'विराट' प्रतिक्रिया

नवी दिल्ली: विराट कोहलीने (Virat Kohli) रॉयल चॅलेंजर बेंगलोरचा (Royal Challengers Bangalore) कर्णधारपदाचा राजीनामा दिला होता. त्यानंतर आरसीबीला आयपीएल 2022 लिलावात कर्णधाराचाही खरेदी करावी लागली होती. दरम्यान, आरसीबीने चेन्नई सुपर किंग्जचा धडाकेबाज सलामीवीर फाफ ड्युप्लेसिसला (Faf du Plessis) आपल्या गोटात ओढत सलामीवीर आणि कर्णधार (Captain) असे दोन्ही पक्षी एका दगडात मारले.

यापूर्वी विराट कोहली 2013 पासून आरसीबीचा कर्णधार होता. गेल्या वर्षी त्याने आपले कर्णधारपद सोडून दिले होते. आरसीबीने काही दिवसांपूर्वीच फाफ ड्युप्लेसिस हा विराट कोहलीची जागा घेईल असे स्पष्ट केले होते. आरसीबीने चार वेळा आयपीएल जिंकणाऱ्या चेन्नई सुपर किंग्जमधील (Chennai Super Kings) अव्वल खेळाडू 7 कोटी रूपये खर्चून विकत घेतला. आता तोच संघाचे नेतृत्व करणार आहे. विराट कोहलीने आरसीबीचा कर्णधार म्हणून फाफ ड्युप्लेसिसचीच का निवड केली याचा खुलासा केला.

विराट कोहलीने आरसीबीच्या ट्विटर हँडेलवर शेअर केलेल्या व्हिडिओत सांगितले की, 'लिलावात फाफ ड्युप्लेसिसला घेताना आमची रणनिती स्पष्ट होती. आम्हाला अशा एक चांगल्या कर्णधाराची गरज होती. फाफ हा कसोटी संघाचा कर्णधार (Test Captain) होता. याचबरोबर तो एक सन्मानित क्रिकेटर आहे. आरसीबीमध्ये त्याच्या नेतृत्वाबाबत उत्साहाचे वातावरण आहे. त्याला त्याचा रोल चांगला माहिती आहे.' कोहली पुढे म्हणाला की, 'आमच्या सर्वांसोबत त्याचे चांगले नाते आहे. मला आशा आहे की मॅक्सवेल, दिनेश कार्तिक आणि इतर सगळे संघ सहकारी त्याच्या नेतृत्वात आयपीएलचा आनंद घेतील. विराट कोहली नुकताच आरसीबीच्या सराव शिबिरात दाखल झाला आहे.

विराट कोहलीने यापूर्वीच सांगितले होते की, त्याने आपल्यावरील वर्कलोडचे (Work Load) व्यवस्थापन करण्यासाठी रॉयल चॅलेंजर बेंगलोरची कॅप्टन्सी सोडली आहे. तो म्हणाला, 'मी आयपीएलचा इतका मोठा प्रवास केला हे अविश्वसनीय आहे. मात्र आता मी नवी उर्जा घेऊन मैदानात उतरणार आहे. कारण माझ्यावरील अनेक जबाबदाऱ्या आणि कर्तव्यातून मी आता मुक्त झालो आहे.'