Paris Olympic Trials Rifle-Pistol : ईशा सिंग, भावेश शेखावत पहिल्या स्थानावर

नवी दिल्ली : पॅरिस ऑलिंपिक चाचणी रायफल-पिस्तूल प्रकारात महिलांच्या २५ मीटर पिस्तूलमध्ये ईशा सिंगने पहिले स्थान मिळवले आहे; तर पुरुषांच्या २५ मीटर रॅपिड फायर पिस्तूलमध्ये भावेश शेखावत पहिल्या क्रमांकावर आहे.

दिल्लीतील कर्णी सिंग नेमबाजी रेंजवर ही स्पर्धा आजपासून सुरू झाली. ईशाने एकूण ५८५ गुणांची कमाई केली. तसेच रॅपिड फायर प्रकारात तीन सिमरनप्रीत कौर ब्रार हिच्यावर दोन गुणांची आघाडीही घेतली. अनुभवी नेमबाज मनु भाकर हिला ५८२ गुणांसह तिसरे; तर अभिज्ञा पाटील (५७७) आणि ऱ्हिदम संगवान (५७४) हिला अनुक्रमे चौथे आणि पाचवे स्थान मिळाले.

पुरुषांमध्ये भावेशने सर्वाधिक ५८० गुण मिळवले. सातत्यपूर्ण कामगिरीचा त्याला फायदा झाला. विजयवीर सिद्धू (५७९) आणि अनिश (५७८) यांना अनुक्रमे दुसरा आणि तिसरा क्रमांक मिळवला आहे. विजयवीर आणि अनिश यांनी या प्रकारात ऑलिंपिक कोटा मिळवलेला आहे. उद्या या सर्वांची अंतिम फेरी होणार आहे.