महाराष्ट्राचे दोन्ही संघ गटात अव्वल; राष्ट्रीय खो-खो स्पर्धेत ओडिसा, उत्तर प्रदेश, कर्नाटक, पंजाबचे विजय

टिपटूर (कर्नाटक) : महाराष्ट्राचे दोन्ही संघ (किशोर-किशोरी) राष्ट्रीय खो-खो स्पर्धेच्या साखळी फेरीत गटात अव्वल स्थानावर राहिले. मेघालय व नागालँड हे प्रतिस्पर्धी संघ अनुपस्थित राहिल्यामुळे महाराष्ट्राच्या संघांना पहिल्या स्थानावर कायम राहता आले. कर्नाटकमध्ये ही स्पर्धा सुरू आहे. किशोर विभागात ओडिसा, उत्तर प्रदेश; तर किशोरी विभागात यजमान कर्नाटकसह पंजाबने विजयी वाटचाल सुरू ठेवली.

किशोर विभागामध्ये ओडिसाने कोल्हापूरचा २८-२४ असा ४ गुण आणि २.३० मि. राखून विजय मिळवला. ओडिसाच्या बापून हंसदा (३ मि. संरक्षण व २ गुण), बिजय तुईका (१.१५, १.२० मि. संरक्षण), बिकाराम मोहंती (नाबाद १.३० मि. संरक्षण व २ गुण) यांनी चांगला खेळ केला. कोल्हापूरच्या कार्तिक फरकटे (२.१० मि. संरक्षण व ३ गुण) याने अष्टपैलू खेळ केला.

याच विभागात उत्तर प्रदेशने गोव्याचा २८-१४ असा एक डाव १४ गुणांनी एकतर्फी विजय मिळवला. विजयी संघाच्या देव कुमार (५.३० मि. संरक्षण व २ गुण), अनुप (२.५०, १.२० मि. संरक्षण व ४ गुण), अमन चौहान (१.१० मि. संरक्षण व ६ गुण) यांनी धडाकेबाज खेळ केला. गोव्यातर्फे धीरज (१ मि. संरक्षण), दीपक (८ गुण) यांनी छान खेळ केला.

मणिपूर, ओडिसाचा पराभव

किशोरी विभागात यजमान कर्नाटकने मणिपूरचा ४२-६ असा एक डाव ३६ गुणांनी धुव्वा उडवला. कर्नाटकच्या विजया लक्ष्मी (नाबाद ७ मि. संरक्षण), निंगमा डी. (३.२० मि. संरक्षण), लावण्या व्ही. (२.३० मि. संरक्षण व १६ गुण),

बी. फातिमा (८ गुण) यांनी उत्कृष्ट कामगिरी केली. मणिपूरकडून एल. अल्बीनाने (४ गुण) ठसा उमटवला. अन्य सामन्यात पंजाबने ओडिसाचा ३०-१८ असा १२ गुणांनी पराभव केला. खुषप्रित (३.००, १.१० मि. संरक्षण व २ गुण), हरमन कौर (१.२०, २ मि. संरक्षण व २ गुण), रजनी राणी (८ गुण) यांनी सर्वोत्तम खेळ करत पंजाब संघाकडून महत्त्वाची भूमिका बजावली. ओडिसातर्फे लिडीना नाथ (१.२० मि. संरक्षण), सुभसनरी मल्लिका (६ गुण) यांनी चांगला खेळ केला.