Michael Hussey : विराट अन् बाबर पेक्षाही भारी! हसीने केले इंग्लंडच्या 'या' फलंदाजाचे तोंडभरून कौतुक

Michael Hussey Praise Dawid Malan : इंग्लंडने टी 20 मालिकेत नुकतीच ऑस्ट्रेलियाला त्यांच्याच मायभूमीत मात दिली. टी 20 वर्ल्डकप पूर्वी इंग्लंडने विश्वविजेत्या संघाला धूळ चारल्याने त्यांचा आत्मविश्वास चांगलाच दुणावला असेल. दरम्यान, इंग्लंडच्या कोचिंग टीममधल्या माईकल हसीने इंग्लंडचा आघाडीचा फलंदाज डेव्हिड मलानला त्याच्या 50 व्या टी 20 सामन्यासाठी एक खास कॅप देऊन त्याचा गौरव केला. याचवेळी हसीने एक मोठे वक्तव्य केले. त्याने डेव्हिड मलानची विराट कोहली आणि बाबर आझम यांच्याशी तुलना केली.

मायकल हसीने शुक्रवारी इंग्लंड आणि ऑस्ट्रेलिया यांच्यातील तिसऱ्या टी 20 सामन्यादरम्यान डेव्हिड मलानविषयी वक्तव्य केले. तो म्हणाला, 'इंग्लिश कॅप, मी माझ्या आयुष्यात असं कधी करेन असं मला वाटलं नव्हतं. मलान तुझे इंग्लंडकडून 50 वा टी 20 सामना खेळत असल्याबद्दल अभिनंदन. मलान तू तुझ्या छोट्याशा कारकिर्दित बऱ्याच गोष्टी साध्य केल्या आहेस. इंग्लंडकडून करण्यात आलेल्या चार टी 20 शतकांपैकी एक शतक तुझे आहे. बराच काळ जागतील नंबर वन खेळाडू राहिला आहे. याचबरोबर सर्वात वेगवान 1000 धावा पूर्ण करणारा फलंदाज ठरलास. माझ्या मते सामन्यांच्या बाबतीत विराट कोहली आणि बाबर आझमपेक्षाही सरस.'

हसी पुढे म्हणाला की, 'मात्र जॉस बटलर सातत्याने सांगतोय की आपल्याला पुढं जायंच आहे. आपल्या समोर जे आव्हान आहे त्याचा सामना करायचा आहे. गेल्या आठ दहा सामन्यात तुम्ही वैयक्तिकरित्या अनेक यशाची शिखर पार केली आहे. मात्र मला आशा आहे की महिन्याभरानंतर तुमच्या गळ्यात वर्ल्डकप जिंकलेलं पदक असणार आहे.'

इंग्लंड आपली टी 20 वर्ल्डकप मोहिम 22 ऑक्टोबरपासून सुरू करणार आहे. त्यांचा पहिला सामना अफगाणिस्तानविरूद्ध असणार आहे. इंग्लंडच्या ग्रुपमध्ये ऑस्ट्रेलिया, न्यूझीलंड या संघाचा देखील समावेश आहे. याचबरोबर अजून दोन संघ पात्रता फेरी खेळून या ग्रुपमध्ये दाखवल होतील.