French Open : मीडियाशी अबोला ओसाकाला पडला 11 लाखाला

जपानची स्टार टेनिसपटू नाओमी ओसाका (Naomi Osaka) हिच्यावर फ्रेंच ओपनच्या (French Open 2021) पहिल्याच सामन्यानंतर दंडात्मक कारवाई करण्यात आली. सामना जिंकल्यानंतर मीडियासमोर येणे टाळल्यामुळे तिला 15,000 डॉलर (जवळपास 11 लाख रुपये) दंड आकारण्यात आलाय. पुढील सामन्यातही ती आपल्या भूमिकेवर ठाम राहिली तर तिच्यावर कठोर कारवाई करण्यात येईल, असे आयोजकांनी म्हटले आहे. दंडाची रक्कम तिच्या बक्षीसातून कपात करण्यात येणार आहे.

ओसाकाने स्पर्धेपूर्वीच मीडियासमोर न बोलण्याचा पवित्रा घेतला होता. पहिल्या सामन्यानंतर ती आपल्या मतावर ठाम राहिली. जगातील सर्वाधिक कमाई करणाऱ्या महिला टेनिसपटूने बुधवारी ट्विटच्या माध्यमातून आपली भूमिका स्पष्ट केली होती. या भूमिकेमुळे माझ्यावर जी दंडात्मक कारवाई केली जाईल ती रक्कम चॅरिटीला देईन, असे तिने म्हटले होते.

यंदाच्या फ्रेंच ओपन स्पर्धेत नावोमी ओसाकाने दमदार सुरुवात केली आहे. तिने 63 व्या मानांकित पॅट्रिसिया मारिया टिग हिला 6-4, 7-6 असे सरळ सेटमध्ये पराभूत केले. जागतिक क्रमवारीत दुसऱ्या स्थानावर असलेल्या ओसाका दुसऱ्या फेरीतील सामन्यात एना बोग़डन विरुद्ध खेळण्यासाठी कोर्टवर उतरेल.

मागील वर्षी कोरोनाच्या संकटामुळे फ्रेंच ओपन स्पर्धा सप्टेंबरमध्ये पार पडली होती. यावेळी एक आठवडा उशीराने स्पर्धेला सुरुवात झालीये. यंदाच्या स्पर्धेसाठी 5000 प्रेक्षकांना परवानगी देण्यात आली आहे.

महिला गटातील अन्य एका सामन्यात तीन वेळा ग्रँडस्लॅमवर कब्जा करणारी अँजेलिक कर्बर हिला पहिल्याच फेरीत गाशा गुंडाळावा लागला. तिसऱ्यांदा ती फ्रेंच ओपन स्पर्धेतील पहिल्याच राउंडमधून बाहेर पडली आहे. फ्रेंच ओपन स्पर्धेच्या पहिल्या दिवशी मोठा उलटफेर झाल्याचे पाहायला मिळाले. कर्बरशिवाय दोनवेळचा ग्रँडस्लॅम फायनलिस्टर डोमिनिक थीमला अनभवी पब्लो एंजुअरने पराभूत केले. थीमला 4-6, 5-7, 6-3, 6-4 आणि 6-4 अशा फरकाने पराभव स्वीकारावा लागला.