Neeraj Chopra Advice Jasprit Bumrah : बुमराहला जर वेग वाढवायचा असेल तर... स्टार भालाफेकपटू नीरजने दिला मोलाचा सल्ला

Neeraj Chopra Advice Jasprit Bumrah : ऑलिम्पिक सुवर्ण पदक विजेता भालाफेकपटू नीरज चोप्राने भारताचा वेगवान जसप्रीत बुमराहला एक मैत्रीपूर्ण सल्ला दिला आहे. इंडियन एक्सप्रेसच्या आयडिया एक्सचेंज कार्यक्रमात बोलताना नीरजने हा बुमराहला हा सल्ला दिला. यावेळी नीरजने नरेंद्र मोदी स्टेडियममध्ये वनडे वर्ल्डकप फायनलचा सामना पाहण्याचा अनुभव कसा होता हे देखील सांगितले.

नीरजने जसप्रीतला कोणता सल्ला दिला?

नीरज चोप्राने आपल्या भालाफेकमधील अनुभवानुसार जसप्रीत बुमराह आपल्या गोलंदाजीचा वेग कसा वाढवू शकतो हे सांगितले. नीरज चोप्रा म्हणाला की, 'मला जसप्रीत बुमराह खूप आवडतो. त्याची गोलंदाजीची शैली खूप वेगळी आहे. मला असं वाटतं की जर त्यानं त्याचा रन अप वाढवला तर तो अजून वेगाने गोलंदाजी करू शकेल.'

नीरज पुढे म्हणाला की, 'एक भालाफेपटू म्हणून आम्ही कायम गोलंदाज कशा प्रकारे आपला वेग वाढवू शकतो याची चर्चा करतो. जर बुमराहने अजून मागून आपला रन अप सुरू केला तर त्याचा अजून वेग वाढेल. मला त्याची स्टाईल खूप आवडते.'