सबस्क्राईब करा
नागपूर : ऑलिंपिक सुवर्णपदक विजेता व विश्वविजेता भालाफेकपटू नीरज चोप्रा तब्बल तीन वर्षांच्या कालावधीनंतर मायदेशातील स्पर्धेत सहभागी होत आहे. येत्या १२ तारखेपासून भुवनेश्वर (ओडिशा) येथे होत असलेल्या २७व्या फेडरेशन करंडक स्पर्धेत हरियानाने नीरजची प्रवेशिका पाठवली आहे. नीरजप्रमाणे किशोर जेना, डी.पी. मनू हे अन्य दोन भालाफेकपटूही सहभागी होत आहेत.
भारतीय ॲथलेटिक्स महासंघाने बुधवारी सहभागी खेळाडूंची नावे जाहीर केली. तीन वर्षांपूर्वी पतियाळा येथे झालेली फेडरेशन करंडक स्पर्धा नीरजची मायदेशातील शेवटची स्पर्धा होती. या स्पर्धेत त्याने ८७.८० मीटर भाला फेकून नवीन स्पर्धा विक्रम प्रस्थापित केला होता. हा विक्रम अद्याप कायम आहे. तीन वर्षांपासून तो विदेशातच सराव करीत आहे. तिथूनच तो थेट आंतरराष्ट्रीय स्पर्धेत सहभागी होत होता.
भुवनेश्वर येथे दाखल होण्यापूर्वी तो १० मे रोजी दोहा येथे होणाऱ्या डायमंड लीग स्पर्धेत किशोर जेनासोबत सहभागी होत आहे. भुवनेश्वरचे मैदान नीरजसाठी नवीन नाही. २०१७ मध्ये येथे झालेल्या आशियाई ॲथलेटिक्स स्पर्धेत त्याने स्पर्धा विक्रमासह सुवर्णपदक जिंकले होते.
पॅरिस ऑलिंपिकसाठी ८५.५० मीटर अशी पात्रता असून नीरजप्रमाणेच किशोरने यापूर्वीच पात्रता गाठली आहे. किशोरने गतवर्षी आशियाई क्रीडा स्पर्धेत रौप्यपदक जिंकताना ८७.५४ मीटर अशी फेक करीत पात्रता गाठली होती.
ऑलिंपिकच्या सुवर्णपदकाचा यंदा बचाव करणे हे माझे लक्ष्य असले तरी, ९० मीटर अंतरापेक्षा अधिक अंतरावर भाला फेकणे माझ्यासाठी आणखी विशेष आहे.
- नीरज चोप्रा
भुवनेश्वर येथे भालाफेक
एकूण स्पर्धक २४
पात्रता स्पर्धा
१४ मे - सकाळी ७.१५ (ग्रुप अ), सकाळी ८.२० (ग्रुप ब)
अंतिम फेरी
१५ मे - रात्री ७ वाजता
प्रमुख स्पर्धक
नीरज चोप्रा (हरियाना), किशोर जेना (ओडिशा), डी. पी. मनू (कर्नाटक), शिवपाल सिंग (उत्तर प्रदेश), विकास यादव (उत्तर प्रदेश), रोहित कुमार (दिल्ली), उत्तम पाटील (महाराष्ट्र).
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.