Rahkeem Cornwall Run Out : इतका निवांतपणा बरा नाही! क्रिकेटच्या इतिहासात असा रन आऊट कधी झाला नाही

Rahkeem Cornwall Run Out : वेस्ट इंडीजचा राहकीम कॉर्नवेल हा आंतरराष्ट्रीय क्रिकेटमधील सर्वात हेवीवेट क्रिकेटपटू म्हणून ओळखला जातो. तो सध्या कॅरेबियन प्रीमियर लीगमध्ये खेळत आहे. बार्बाडोस रॉयल्सकडून खेळणाऱ्या कॉर्नवेलचा एक व्हिडिओ सध्या सोशल मीडियावर चांगलाच व्हायरल होत आहे.

वेस्ट इंडीजचा हा अष्टपैलू खेळाडू खूप विचित्र पद्धतीने धावबाद झाला. क्षेत्ररक्षकाने मिसफिल्डिंग करूनही कॉर्नवेल आपली धाव पूर्ण करू शकला नाही. विशेष म्हणजे तो डावाच्या पहिल्याच चेंडूवर बाद झाला. बार्बाडोस रॉयल्स 201 धावांच्या आव्हानाचा पाठलाग करत होते. कॉर्नवेलला माहिती होतं की त्याच्या संघाला वेगाने धावा करणे गरजेचे आहे. मात्र त्याची धाव तितकी वेगवान नव्हती.

कॉर्नवेल हा कायमच त्याच्या वजनामुळे चर्चेचा विषय ठरला आहे. अनेक क्रिकेट जाणकार, माजी क्रिकेटपटू आणि तज्ज्ञ यांनी रहकीमला त्याचे वजन नियंत्रणात ठेवण्याचा सल्ला दिला आहे. रहकीमने दावा केला आहे की तो योग्य आहार घेतोय मात्र तरी देखील आपले वजन नियंत्रणात रहात नाही.

कॉर्नवेल इएसपीएन क्रिकइन्फोशी बोलताना म्हणाला होता की, 'मी माझ्या शरिराची ठेवण बदलू शकत नाही. मी खूप उंच किंवा मी खूप वजनदार आहे असं म्हणू शकत नाही. प्रत्येकजण बारीक असू शकत नाही. मी फक्त मैदानावर जाऊन माझ्या गुणवत्तेनुसार खेळण्याचा प्रयत्न करू शकतो.'

'मी खूप वजनदार व्यक्ती आहे यात शंका नाही. मात्र मी कष्ट करतोय. मी त्यामध्ये कोणतीही टाळाटाळ करत नाही. मी माझ्या फिटनेसवर बरेच काम करतोय. मी योग्य आहार घेण्याचा प्रयत्न करतोय.'

बार्बाडोस आणि सर. लुसिया किंग्ज यांच्यातील सामन्यात कॉर्नवेलच्या बार्बाडोस संघाला 202 धावांचे आव्हान पार करताना 147 धावांपर्यंतच मजल मारता आली. कॉर्नवेलने वेस्ट इंडीजकडून कसोटी क्रिकेटमध्ये चांगल्या गोलंदाजीचे प्रदर्शन केले होते. मात्र या सामन्यात त्याने गोलंदाजी केली नाही. फलंदाजीतही त्याला भोपळाही फोडता आला नाही.

(Sports Latest News)