Ravi Shastri : टीम इंडियाचे प्रशिक्षक पुन्हा शास्त्री होणार? म्हणाले- 'सात वर्षे जे...'

Ravi Shastri on Coaching : रवी शास्त्रीच्या प्रशिक्षणात टीम इंडियाची कामगिरी चांगली राहिली होती. परदेशात भारतीय संघाने त्यांच्या प्रशिक्षणाखाली कसोटी क्रिकेटमध्ये उत्कृष्ट कामगिरी केली. गेल्या वर्षी UAE मध्ये झालेल्या T20 विश्वचषकानंतर त्याचा कार्यकाळ संपला. त्याच्या जागी राहुल द्रविडकडे कमान सोपवण्यात आली आहे. दरम्यान, भारताचे माजी प्रशिक्षक रवी शास्त्री म्हणाले की, मला दुसऱ्यांदा कोचिंग करायचे नाही. कोच म्हणून जे काही करायचे होते ते मी सात वर्षांत करून दाखविले आहे. आता प्रेक्षक म्हणून खेळाचा आनंद घ्यायचा आहे.

शास्त्री यांनी सात वर्षे भारताचे प्रशिक्षकपद भूषवले आहे. याआधी कोणीही इतक्या वर्ष करू शकले नव्हते. प्रशिक्षक म्हणून त्यांनी ऑस्ट्रेलियात दोनदा कसोटी मालिका जिंकली. त्याच्या आधी कोणत्याही भारतीय प्रशिक्षकाने ऑस्ट्रेलियात एकदाही मालिका जिंकलेली नव्हती. याशिवाय त्यांनी तयार केलेली वेगवान गोलंदाजांची फौज आजही सर्वांना घाबरते. त्याच गोलंदाजांच्या जोरावर टीम इंडिया आजही परदेशात कसोटी मालिका जिंकण्यात यशस्वी ठरते. मात्र रवी शास्त्रीला आयसीसीची एकही ट्रॉफी जिंकता आली नाही.

रवी शास्त्रींना जेव्हा विचारण्यात आले की, तुम्हाला पुन्हा भारताचे कोच होणार का? तेव्हा शास्त्री म्हणाले, माझा कोचिंग काळ संपला आहे. सात वर्षे जे आवश्यक होते, ते मी केले. आता मी दुरूनच खेळ पाहीन आणि त्याचा आनंद घेईन. या वर्षाच्या सुरुवातीला, शास्त्री आयपीएल 2022 दरम्यान कॉमेंट्री बॉक्समध्ये परतले. सध्या लेजेंड्स लीग क्रिकेट 2022 चे कॉमेंट्री करत आहे.