Ravindra Jadeja : आशिया कपनंतर गुडघा दुखापतीमुळे जडेजा T-20 World Cup मधूनही बाहेर!

Ravindra Jadeja T20 World Cup 2022 : भारताचा हुकमी फिरकी अष्टपैलू आणि चपळ क्षेत्ररक्षक रवींद्र जडेजा ऑस्ट्रेलियात होणाऱ्या ट्वेन्टी-20 विश्वकरंडक स्पर्धेत जवळपास मुकणार आहे. त्याला गुडघ्याची दुखापत गंभीर असून अनिश्चित काळासाठी तो मैदानापासून दूर राहाण्याची शक्यता वर्तवण्यात येत आहे. आशिया करंडक क्रिकेट स्पर्धेत जडेजा पाकिस्तान आणि हाँगकाँगविरुद्धच्या सामन्यात खेळला. पाकविरुद्ध तर त्याची फलंदाजी मौल्यवान ठरली होती.

जडेजाच्या उजव्या गुडघ्याची दुखापत फार गंभीर आहे. त्याला मोठ्या शस्त्रक्रियेस सामोरे जावे लागणार आहे. त्यामुळे तो बराच काळ क्रिकेटपासून दूर राहील. एका राष्ट्रीय क्रिकेट अकादमीतील जडेजाच्या गुडघ्याचे निदान केल्यानंतर स्पष्ट केल्याची माहिती बीसीसीआयच्या एका अधिकाराने दिली. ही दुखापत निश्चित कोणत्या स्वरूपाची आहे हे स्पष्ट झाले नाही; परंतु अँटिरिर क्रुसिएट लिगामेंट या स्वरूपाची ही दुखापत असेल तर सहा महिने तरी तो खेळू शकणार नाही, असेही सांगण्यात आले. पण सध्या तरी तो तीन महिने क्रिकेटपासून दूर असेल.

जडेजाला गुडघा दुखापतीचा त्रास अधूनमधून होत असतो, तो तिन्ही प्रकारांबरोबर आयपीएलमध्ये खेळत असल्याचा ताण त्याच्या गुडघ्यावर आला असेल, अशी भीती व्यक्त करण्यात येत आहे. गोलंदाजी करताना उजव्या पायाच्या त्याच्या गुडघ्यावर अधिक ताण पडत असतो.

जडेजा आतापर्यंत खेळलेल्या तिन्ही प्रकारांतील देशांतर्गत तसेच आंतरराष्ट्रीय (प्रथम श्रेणी, अ श्रेणी आयपीएलसह) सामन्यांची संख्या जवळपास ६३० पर्यंत जात आहे आणि त्यात त्याने ७ हजारांहून अधिक षटके टाकली आहेत. यात नेटमधील सरावाच्या चेंडूंचा समावेश नाही.