रोहितने आंतरराष्ट्रीय पदार्पणाला 15 वर्ष पूर्ण झाल्यानंतर शेअर केले 'खास' पत्र

नवी दिल्ली : भारताचा कर्णधार रोहित शर्माने आंतरराष्ट्रीय क्रिकेटमध्ये पदार्पण केल्याला आज 15 वर्षू पूर्ण झाली आहेत. या निमित्ताने रोहित शर्माने सोशल मीडियावर एक पत्र पोस्ट केले. या पत्रात त्याने एक खेळाडू म्हणून माझ्या जडणघडणीमध्ये ज्यांचे योगदान आहे त्यांचे आभार मानले. (Rohit Sharma Debut 15 Years Completed Share Emotional Letter)

रोहित शर्माने 23 जून 2007 ला आयर्लंडविरूद्ध बेलफास्टमध्ये आंतरराष्ट्रीय क्रिकेटमध्ये पदार्पण केले होते. आज या दिवसाच्या आठवणींना उजाळा देताने रोहितने एक पत्र सोशल मीडियावर पोस्ट केले. रोहित शर्माने टीम इंडियाच्या जर्सीचा फोटो शेअर करत ट्विट केले की, 'माझ्या आवडत्या जर्सीला 15 वर्षे पूर्ण झाले.' याचबरोबर रोहित शर्मा पोस्ट केलेल्या पत्रात म्हणतो. 'मी त्या सर्वांचे आभार मानतो जे माझ्या या प्रवासात माझ्या बरोबर होते. ज्यांनी मला एक खेळाडू म्हणून तयार होताना मदत केली त्यांचे धन्यवाद. सर्व क्रिकेट प्रेमी, चाहते आणि टीकाकार तुमचे प्रेम आणि साथ याच्या जोरावरच मी अडचणींवर मात करू शकलो.'

35 वर्षाच्या रोहित शर्माने वनडे 230 सामन्यात 223 डावात फलंदाजी करत 9 हजार 283 धावा केल्या आहेत. त्याची सरासरी 48.60 इतकी आहे. यात 29 शतकांचा समावेश आहे. रोहितने आतापर्यंत 125 टी 20 सामने खेळत 3 हजार 313 धावा केल्या आहेत. यात चार शतके आणि 26 अर्धशतकांचा समावेश आहे. कसोटीत 45 सामन्यात 77 डावात 3 हजार 137 धावा केल्या आहेत. त्याची कसोटीतील सरासरी 46.13 अशी आहे. यात आठ शतके आणि 14 अर्धशतकांचा समावेश आहे.