मेदवेदेव, स्वीयतेकची विजयी वाटचाल

पॅरिस : रशियाचा स्टार टेनिसपटू डॅनिल मेदवेदेव व पोलंडची इगा स्वीयतेक यांनी फ्रेंच ओपन या मानाच्या टेनिस स्पर्धेतील शनिवारचा दिवस गाजवला. मेदवेदेव याने मिओमिर केकमॅनोविच याला पराभूत केले, तर स्वीयतेकने माँटेनेग्रोच्या डांका कोविनीच हिला नमवले. दुसरा मानांकित मेदवेदेवच्या जबरदस्त खेळासमोर केकमॅनोविचचा निभाव लागला नाही. मेदवेदेव याने केकमॅनोविचवर ६-२, ६-४ व ६-२ अशा फरकाने विजय मिळवला. मेदवेदेव याने ही लढत १ तास व ४८ मिनिटांमध्ये जिंकली. नंबर वन स्थानावरील स्वीयतेक हिने कोविनीच हिला ६-३, ७-५ अशा फरकाने अगदी सहज हरवले. एक तास व ३० मिनिटांमध्ये तिने हा विजय साकारला.

रोहन-मिडलकूपचा थरारक विजय

भारताचा अनुभवी टेनिसपटू रोहन बोपन्ना व त्याचा साथीदार मॅटवे मिडलकूप या जोडीने शनिवारी विम्बल्डन विजेत्या जोडीवर थरारक विजय मिळवला. बोपन्ना-मिडलकूप या जोडीने पाच मॅच पॉईंट वाचवून हा सामना जिंकला हे विशेष. बोपन्ना-मिडलकूप ही जोडी पहिल्या सेटमध्ये ६-७ अशा फरकाने पराभूत झाली. यानंतर मात्र बोपन्ना-मिडलकूप या दोघांनीही दबावाखाली आपला खेळ उंचावला. पुढील दोन सेट या जोडीने ७-६, ७-६ अशा फरकाने जिंकत आगेकूच केली.

सबालेंका हरली, रुबलेव जिंकला

बेलारुसच्या ए. सबालेंका हिला इटलीच्या कॅमिला जिऑर्जी हिच्याकडून हार सहन करावी लागली. इटलीच्या टेनिसपटूने सबालेंका हिचे कडवे आव्हान ४-६, ६-१, ६-० अशा फरकाने परतवून लावत महिला एकेरीत पुढे पाऊल टाकले. सातव्या मानांकित आंद्रेय रुबलेव याला विजयासाठी संघर्ष करावा लागला. पण दबावाखाली त्याने अव्वल दर्जाचा खेळ केला. त्याने चिलीच्या ख्रिस्तीयन गरीन याच्यावर ६-४, ३-६, ६-२, ७-६ अशा फरकाने विजय मिळवला.