Sachin Tendulkar : मास्टर ब्लास्टरने ठोकल्या 168 च्या स्ट्राईक रेटने धावा; युवराजच्या संघाला दिली शेवटच्या षटकात मात

Sachin Tendulkar : भारताचा माजी फलंदाज सचिन तेंडुलकर आणि युवराज सिंग आज एकमेकांसमोर उभे ठाकले होते. श्रीय साई मधुसूदन साई ग्लोबल ह्युमॅनिटेरियन मिशनकडून एका मैत्रीपूर्ण सामन्याचे आयोजन करण्यात आलं होतं. यावेळी वन वर्ल्ड आणि वन फॅमली यांच्यात सामना रंगला होता.

या सामन्यात मास्टर ब्लास्टर सचिन तेंडुलकरच्या स्ट्राईक रेटचीच चर्चा रंगली. वयाच्या 50 व्या वर्षी खेळताना देखील आपल्या बॅटची धार अजून कमी झाली नसल्याचे दाखवून दिले. सचिन तेंडुलकरने 10 वर्षापूर्वी आंतरराष्ट्रीय क्रिकेटमधून निवृत्ती घेतली होती. तो अधून-मधून सामने खेळताना दिसतो.

दरम्यान, साई मधुसूदन साई ग्लोबल ह्युमॅनिटेरियन मिशनकडून एक सामना आयोजित करण्यात आला. हा सामना वन वर्ल्ड आणि वन फॅमली या दोन संघांदरम्यान झाला. यात सचिन तेंडुलकर, युवराज सिंग याच्यासह जगभरातील नावाजलेल्या क्रिकेटपटूंनी सहभाग नोंदवला.

सामन्यात सचिन तेंडुलकरने अष्टपैलू कामगिरी केली. त्याने 16 चेंडूत 27 धावा केल्या. या धावा त्याने 168.8 च्या स्ट्राईक रेटने केल्या. यात तीन चौकार आणि एका षटकाराचा देखील समावेश होता.

गोलंदाजीबाबत बोलायचं झालं तर सचिन तेंडुलकरने 2 षटकात 23 धावा देत 1 विकेट घेतली. त्याबरोबर सचिनने युवराज सिंगचा झेल देखील पकडला.

या सामन्यात सचिन तेंडुलकरच्या संघाने विजय मिळवला. तो या संघाचे नेतृत्व करत होता. तर वन फॅमली संघाचे नेतृत्व युवराज सिंगकडे होते. युवराजच्या संघाने प्रथम फलंदाजी करत 20 षटकात 181 धावा केल्या.

याच्या प्रत्युत्तरात खेळताना सचिनच्या संघाने हे आव्हान शेवटच्या षटकातील पाचव्या चेंडूवर पूर्ण केलं. ज्यावेळी सचिनच्या वन वर्ल्ड संघाला विजयासाठी 2 चेंडूत 3 धावांची गरज होती त्यावेळी इरफान पाठाणने मोठा भाऊ युसूफ पठाणच्या चेंडूवर षटकार मारत विजय मिळवला.

(Sports Latest News)