सात्विकसाईराजचे दुहेरीत दुहेरी यश

मुंबई : सात्विकसाईराज रांकीरेड्डीने चायना ओपन बॅडमिंटन स्पर्धेच्या सलामीच्या दिवशी दुहेरीतील दोन्ही लढती जिंकल्या. सात्विकने अश्विनी पोनप्पासह मिश्र दुहेरीत सलामीची लढत जिंकताना जागतिक क्रमवारीत सातव्या जोडीस हरवले; तर त्यानंतर सात्विक-चिराग शेट्टीने पुरुष दुहेरीची लढत दोन गेममध्येच जिंकली.

चॅंगझाऊ येथे सुरू असलेल्या 10 लाख डॉलर बक्षीस रकमेच्या या स्पर्धेत सात्विक-अश्विनीने प्रवीण जॉर्डन-मेलाती दाएवा ऑक्ताविआंती यांना 22-20, 17-21, 21-17 असे 50 मिनिटांत पराजित केले. सात्विक-चिरागने जॅसन अँथनी होऊ शूए-न्यी याकुरा यांना 21-7, 21-18 असे अर्ध्या तासात पराजित केले.

जॉर्डन-मेलातीने आतापर्यंत एकंदर पाच स्पर्धांत अंतिम फेरी गाठली आहे, सात्विक-अश्विनीने त्यांना मोक्‍याच्यावेळी दडपणाखाली आणले. पहिल्या गेममधील 4-7 पिछाडीनंतर भारतीय जोडीचा खेळ उंचावला. मात्र, ते ब्रेकच्या 11-10 आघाडीनंतर 12-18 मागे पडले. भारतीयांचा चिवट प्रतिकार अखेर सरस ठरला. दुसऱ्या गेममध्ये पहिल्या गेमचीच काहीशी पुनरावृत्ती झाली, पण प्रतिकार सुरू होत असतानाच भारतीयांकडून चुका झाल्या. निर्णायक गेममध्ये सुरुवातीस घेतलेली 4-2 आघाडी भारतीयांनी 11-6 करीत निकालच स्पष्ट केला.

सात्विक-चिरागने सुरुवातीस 6-0 आघाडी घेतल्यापासून निकाल स्पष्ट होता. पहिल्या गेममध्ये त्याने कधीही सलग दोन गुण गमावले नाहीत. दुसऱ्या गेममध्ये भारतीय सुरुवातीपासून मागे पडले, पण 7-15 पिछाडीनंतर त्यांनी सलग नऊ गुण घेत आघाडी घेतली आणि ती कधीही गमावली नाही.

भारतीयांसमोरील आजचे आव्हान
सिंधू वि. ली झूएरुई
- जागतिक क्रमवारीत सिंधू सहावी, तर ली 19 वी
- प्रतिस्पर्ध्यातील सहा लढतीत दोघांचे तीन विजय
- यंदाच्या एकमेव लढतीत सिंधूची पहिला गेम गमावल्यावर सरशी, त्यापूर्वीची लढत चार वर्षापूर्वी

साईना वि. बुसनान ऑगबॅमारुंगफान
- जागतिक क्रमवारीत साईना आठवी, तर बुसनान 18 वी
- प्रतिस्पर्ध्यातील चारपैकी तीन लढतीत साईनाचा विजय
- दोघींतील यापूर्वीची लढत 2017 मध्ये, त्यात साईना पराजित