Wimbledon जोकोविचनं दहाव्यांदा गाठली सेमीफायनल!

लंडन : टेनिस जगतातील नंबर वन सर्बियन टेनिस स्टार नोवाक जोकोविचने बुधवारी सरळ सेटमध्ये विजय नोंदवत विम्बल्डनची सेमीफायनल गाठली. सहाव्यांदा विम्बल्डनचे जेतेपद मिळवण्यासाठी तो सुसाट कामगिरी करताना दिसतोय. जोकोविचने सेंटर कोर्टवर झालेल्या सामन्यात हंगेरीच्या बिगर मानांकित मार्टन फुकसोविच याला 6-3, 6-4, 6-4 असे सरळ सेटमध्ये पराभूत केले. या विजयासह त्याने दहाव्यांदा विम्बल्डनच्या सेमीफायनलमध्ये प्रवेश केलाय. ग्रँडस्लॅम स्पर्धेत त्याने 41 वेळा अंतिम चारमध्ये स्थान मिळवले आहे.

20 व्या ग्रँडस्लॅमला गवसणी घालून विक्रमाची बरोबरी करण्याच्या इराद्याने तो विम्बल्डनच्या कोर्टवर उतरला आहे. आतापर्यंत त्याने सहज विजय नोंदवत आपली स्पर्धेतील दावेदारी भक्कम केलीये. सर्बियाच्या 34 वर्षीय टेनिस स्टारने यंदाच्या हंगामात ग्रँडस्लॅम स्पर्धेत तब्बल 19 सामने जिंकले आहेत. त्याला कॅलेंडर ग्रँडस्लॅम पूर्ण करण्याची संधी देखील आहे. रॉड लीवर (1969) नंतर कोणत्याही पुरुष खेळाडूला हा पराक्रम करता आलेला नाही.

पहिल्यांदाच ग्रँडस्लॅमच्या क्वार्टर फायनलपर्यंत पोहचलेल्या फुकसोविच विरुद्ध जोकोविचने पहिल्या 18 मिनिटातच 5-0 अशी आघाडी घेतली होती. त्यानंतर जोकोविचने तीन गेम गमावल्यानंतर सेट आपल्या नावे केला. दुसरा आणि तिसरा सेट त्याने आरामात खिशात घातला. सेमीफायनलमध्ये जोकोविच 10 व्या मानांकित डेनिस शापोवालोव याच्या विरुद्ध खेळताना दिसेल.