IND vs AUS: ऑस्ट्रेलिया मालिकेआधी टीम इंडियाला मोठा धक्का! हा दिग्गज खेळाडू बाहेर

India vs Australia Test Series 2023 : भारत आणि ऑस्ट्रेलिया यांच्यातील कसोटी मालिका ९ फेब्रुवारीपासून सुरू होत आहे. वर्ल्ड टेस्ट चॅम्पियनशिपची फायनल पाहता टीम इंडियासाठी ही मालिका खूप महत्त्वाची आहे. पण या मालिकेपूर्वी टीम इंडियाला मोठा धक्का बसला आहे. संघाचा दिग्गज खेळाडू दुखापतीमुळे मालिकेतील पहिल्या सामन्यातून बाहेर पडला आहे.

टीम इंडियाने नुकतीच न्यूझीलंडविरुद्ध एकदिवसीय मालिका खेळली आहे. टीम इंडियाचा फलंदाज श्रेयस अय्यर दुखापतीमुळे या मालिकेतून बाहेर पडला. पाठीच्या दुखापतीमुळे श्रेयस अय्यर या मालिकेतून बाहेर होता. मीडिया रिपोर्ट्सनुसार श्रेयस अय्यर अजूनही या दुखापतीतून पूर्णपणे सावरलेला नाही, ज्यामुळे तो ऑस्ट्रेलिया कसोटी मालिकेतील पहिल्या सामन्यातून बाहर पडला आहे.

श्रेयस अय्यर हा सध्याच्या घडीला कसोटी क्रिकेटमधील भारताचा सर्वात महत्त्वाचा खेळाडू आहे. भारतीय क्रिकेट नियामक मंडळाशी (BCCI) संबंधित एका सूत्राने इंडियन एक्सप्रेसला श्रेयस अय्यरबद्दल सांगितले की, 'श्रेयस अय्यरची दुखापत अपेक्षेप्रमाणे बरी झालेली नाही. त्याला पुन्हा क्रिकेट खेळण्यासाठी किमान दोन आठवडे लागतील. पहिल्या कसोटीसाठी तो निश्चितपणे उपलब्ध होणार नाही आणि दुसऱ्या कसोटीसाठी त्याची उपलब्धता त्याच्या फिटनेस अहवालावर अवलंबून असेल.

2022 हे वर्ष श्रेयस अय्यरसाठी खूप संस्मरणीय ठरले. श्रेयस अय्यरने गेल्या वर्षी 17 वनडेत 724 धावा केल्या होत्या. तसेच तो या वर्षी भारतासाठी एकदिवसीय क्रिकेटमध्ये सर्वाधिक धावा करणारा फलंदाज ठरला. त्याचबरोबर श्रेयस अय्यरने टीम इंडियासाठी आतापर्यंत 7 कसोटी, 42 एकदिवसीय आणि 49 टी-20 सामने खेळले आहेत. मात्र या वर्षाची सुरुवात त्याच्यासाठी चांगली झाली नाही.

ऑस्ट्रेलियाविरुद्धच्या पहिल्या दोन कसोटी सामन्यांसाठी टीम इंडिया -

रोहित शर्मा (कर्णधार), केएल राहुल (उपकर्णधार), शुभमन गिल, चेतेश्वर पुजारा, विराट कोहली, श्रेयस अय्यर, केएस भरत (विकेटकीपर), इशान किशन (विकेटकीपर), रविचंद्रन अश्विन, अक्षर पटेल, कुलदीप यादव, रवींद्र जडेजा, मोहम्मद शमी, मोहम्मद सिराज, उमेश यादव, जयदेव उनाडकट, सूर्यकुमार यादव.