IND vs ENG Shubman Gill : गिलचं शतक मात्र इंग्लंडचेही कमबॅक... तिसरा दिवस रंजक, चौथा ठरणार निर्णायक

India Vs England 2nd Test Day 3 Shubman Gill : दुसऱ्या कसोटीत भारताने तिसऱ्या दिवशी दोन सत्रापर्यंत सामन्यावर पकड निर्माण केली होती. भारत जवळपास 450 ची लीड घेणार असं वाटत होतं. मात्र शेवटच्या सत्रात इंग्लंडने जोरदार कमबॅक केला.

त्यांनी भारताचा संपूर्ण संघ 255 धावात गारद करत भारताची आघाडी 399 धावांपर्यंत रोखली. इंग्लंड दुसऱ्या डावाची जवळपास 5 च्या सरासरीने सुरूवात करत भारताला टेन्शन दिलं. सलामीवीरांच्या अर्धशतकी सलामीमुळे इंग्लंडचं पारडं जड होणार असं वाटत होतं. मात्र अश्विनने पहिला धक्का देत थोडा दिलासा दिला. दिवसाचा खेळ संपला त्यावेळी इंग्लंडच्या 67 धावा झाल्या होत्या.

चौथ्या दिवशी इंग्लंडला विजयासाठी 332 धावा करायच्या आहेत तर भारताला अजून इंग्लंडच्या 9 विकेट्स घ्यायच्या आहेत. त्यामुळे तिसरा दिवस रंजक होता तर चौथा दिवस निर्णायक ठरणार आहे. चौथ्या दिवसाच्या पहिल्या सत्रावर ज्याचं वर्चस्व तो कसोटी जिंकण्याचा प्रबळ दावेदार असणार आहे. त्यामुळे भारताला पहिल्या सत्रात निदान तीन विकेट्स घेणं गरजेचं आहे.

भारताने दुसऱ्या कसोटीच्या तिसऱ्या दिवशी बिनबाद 28 धावांपासून आपला दुसरा डाव पुढे खेळण्यास सुरूवात केली. मात्र इंग्लंडच्या जेम्स अँडरसनच्या भेदक माऱ्यासमोर भारताचे दोन्ही सलामीवीर माघारी फिरले.

अँडरसनने रोहितला 13 तर यशस्वी जैस्वालला 17 धावांवर बाद केलं. मात्र त्यानंतर शुभमन गिल आणि श्रेयस अय्यर यांनी तिसऱ्या विकेटसाठी 81 धावांची भागीदारी रचली. ही जोडी भारताला मजबूत स्थितीत पोहचवणार असे वाटत असतानाच टॉम हार्टलीने फोडली. त्याने अय्यरला बाद केलं.

अय्यर बाद झाल्यानंतर गिलने डावाची सूत्रे हातात गेत शतकी खेळी केली. तिसऱ्या क्रमांकावर खेळतानाचे हे त्याचे पहिले कसोटी शतक ठरले. गिलला साथ देणारा अक्षर पटेलही अर्धशतकाजवळ पोहचला होता. त्यांनी पाचव्या विकेटसाठी 89 धावांची भागीदारी रचली. मात्र ही जोडी फुटली गिल 104 धावा करून बाद झाला. गिल बाद झाल्यानंतर अक्षर पटेलनेही पॅव्हेलियन गाठले. तो 45 धावांवर बाद झाला.

चहापानानंतर श्रीकार भारत आणि आर. अश्विनने भारताचा डाव पुढे नेण्याचा प्रयत्न केला. मात्र भारत 6 धावांवर बाद झाला. त्यानंतर आलेला कुलदीपही शुन्यावर बाद झाला. अश्विनने उपकर्णधार जसप्रीत बुमराहसोबत भागीदारी रचण्यास सुरूवात केली. त्याने आठव्या विकेटसाठी 26 धावांची भागीदारी रचली.

मात्र भारताची आघाडी 398 धावांपर्यंत पोहचली असतानाच बुमराह 26 चेंडू खेळून शुन्यावर बाद झाला. पाठोपाठ अश्विनही 29 धावा करून बाद झाला. भारताचा दुसरा डाव 255 धावांवर संपला. भारताने इंग्लंडसमोर विजयासाठी 399 धावांचे आव्हान ठेवले आहे.

भारताचे 399 धावांचे आव्हान घेऊन मैदानात उतरलेल्या इंग्लंडने आक्रमक सुरूवात करण्याचा प्रयत्न केला. सलामीवीर बेन डकेट आणि झॅक क्राऊलीने अर्धशतकी सलामी दिली. मात्र दिवस संपत असतानाच अश्विनने 28 धावा करणाऱ्या बेन डकेटला बाद करत इंग्लंडला पहिला धक्का दिला.

(Sports Latest News)