भारत-न्यूझीलंड मालिकेसाठी प्रेक्षकांची मैदानात उपस्थिती ?

नवी दिल्ली : भारतीय क्रिकेट नियामक मंडळ (बीसीसीआय) १७ नोव्हेंबरपासून सुरू होणाऱ्या भारत-न्यूझीलंड मालिकेसाठी प्रेक्षकांना परवानगी देणार आहे. ‘‘या मालिकेसाठी प्रेक्षक मैदानात पूर्ण क्षमतेने प्रवेश करू शकतील अशी आशा आहे,’’ असे मंडळाचे प्रमुख सौरव गांगुली यांनी शनिवारी म्हटले आहे. कसोटी मालिका आयोजित करणाऱ्या राज्य संघटनांनीही त्या-त्या राज्यांतील कोरोना शिष्टाचारांचे पालन करून प्रेक्षकांना ‘विशिष्ट प्रमाणात’ स्टेडियममध्ये गर्दीची परवानगी दिली जाईल, असे सूचित केले आहे.

या दौऱ्याची सुरुवात १७ नोव्हेंबरला ट्वेन्टी-२० मालिकेने होणार असून जयपूर येथे पहिल्या सामन्याचे आयोजन करण्यात येईल, त्यानंतर रांची आणि कोलकता येथे पुढील सामने खेळले जातील. त्यानंतर २५ नोव्हेंबर ते ७ डिसेंबरदरम्यान कानपूर आणि मुंबई येथे दोन सामन्यांची कसोटी मालिकाही खेळविली जाणार आहे.

‘‘आम्ही कोरोना शिष्टाचार आणि नियमांबद्दल राज्य सरकारच्या संपर्कात आहोत. प्रेक्षकांची सुरक्षितता सर्वात महत्त्वाची असेल आणि सर्व शिष्टाचार पाळले जातील याची खात्री करण्यासाठी आम्ही सर्वतोपरी प्रयत्न करू,’’ असे राज्य संघटनेच्या अधिकाऱ्याने यावेळी म्हटले आहे.