'मिशन WTC'; भारतीय संघ इंग्लंडला रवाना

India Tour of England 2021 : मुंबईमध्ये विलगीकरणाचा कालावधी पुर्ण केल्यानंतर भारतीय पुरुष आणि महिला क्रिकेट संघ बुधवारी रात्री उशीरा इंग्लंडसाठी रवाना झाला आहे. इंग्लंडमध्ये पोहचल्यानंतर भारतीय संघ दहा दिवस विलगीकरणात राहणार आहे. त्यानंतर भारतीय संघाला सराव करण्याची परवानगी देण्यात आली. भारतीय संघ इंग्लंडला रवाना झाल्याचं बीसीसीआयनं ट्विट करत सांगितलं आहे. विराट कोहली, रोहित शर्मा आणि स्मृती मानधना आणि जसप्रीत बुमराह यांचे फोटो बीसीसीआयनं पोस्ट केले आहेत. भारतीय महिला आणि पुरुष संघ चार्टेड प्लेनने इंग्लंडला रवाना झाले आहेत. भारतीय संघाचा हा चार महिन्याचा दौरा आहे.

इंग्लंड दौऱ्यावर भारतीय पुरुष आणि महिला क्रिकेट संघातील खेळाडूंना कुटुंबियांना सोबत नेण्याची परवानगी देण्यात आली आहे. इंग्लंड सरकारने बीसीसीआयने केलेली मागणी मान्य केली आहे. भारतीय संघासोबत कुटुंबियदेखील इंग्लंडला रवाना झाले आहेत. खेळाडूंसोबत जाणाऱ्या त्यांच्या फॅमिली मेंबर्संना देखील कोरोनाच्या प्रोटॉकॉलचे पालन करावे लागणार आहे.

भारत आणि न्यूझीलंड यांच्यात 18 जून रोजी वर्ल्ड टेस्ट चॅम्पियनशिपची फायनल (World Test Championship final) रंगणार आहे. इंग्लंडच्या मैदानातील मेगा फायनलनंतर भारतीय संघ इंग्लंड (England) विरुद्ध 5 सामन्यांची कसोटी मालिका खेळणार आहे.

भारतीय संघ -( India's squad ): विराट कोहली (कर्णधार), अजिंक्य रहाणे (उप कर्णधार), रोहित शर्मा, शुभमन गिल, मयांक अग्रवाल, चेतेश्वर पुजारा, हनुमा विहारी, रिषभ पंत (यष्टीरक्षक), आर अश्विन, रविंद्र जडेजा, अक्षर पटेल, वाशिंग्टन सुंदर, जसप्रीत बुमराह, इंशांत शर्मा, मोहम्मद शमी, मोहम्मद सिराज, शार्दुल ठाकूर, उमेश यादव.