Thomas Cup 2024: भारताचा पुरुष बॅडमिंटन संघ उपांत्यपूर्व फेरीत, इंग्लंडचा 5-0 ने उडवला धुव्वा

Thomas Cup 2024: भारताच्या महिला संघानंतर आता पुरुष संघानेही चेंगडू, चीन येथे चालू असलेल्या थॉमस बॅडमिंटन करंडकाच्या उपांत्यपूर्व फेरीत प्रवेश केला. भारताच्या पुरुष संघाने ‘क’ गटातील साखळी फेरीच्या लढतीत इंग्लंडचा ५-० असा धुव्वा उडवला आणि आगेकूच केली. या गटामधून इंडोनेशिया व भारत यांनी प्रत्येकी दोन विजयांसह बाद फेरीत धडक मारली.

भारताच्या पुरुष संघाने सलामीच्या लढतीत थायलंडवर ४-१ अशी मात केली. शानदार फॉर्म त्यांनी इंग्लंडविरुद्धच्या लढतीतही कायम ठेवला. एकेरीच्या सलामीच्या लढतीत एच. एस. प्रणोय याने हॅरी ह्युअँग याच्यावर २१-१५, २१-१५ असा ४२ मिनिटांमध्ये विजय मिळवला. भारतीय संघाला या विजयामुळे १-० अशी आघाडी मिळवता आली.

सात्विक साईराज रंकीरेड्डी - चिराग शेट्टी या स्टार जोडीला बेन लेन-सीन वेंडी या जोडीचे आव्हान परतवून लावण्यासाठी संघर्ष करावा लागला. सात्विक-चिराग जोडीने प्रतिस्पर्ध्यांचा संघर्ष २१-१७, १९-२१, २१-१५ असा तीन गेममध्ये एक तास व पाच मिनिटांत मोडून काढला.

किदांबी श्रीकांतने पुरुष एकेरीच्या दुसऱ्या लढतीत नदीम दळवीवर २१-१६, २१-११ अशी मात केली. या विजयामुळे भारताचा इंग्लंडवरील विजय निश्‍चित झाला.

अर्जुन-कपिलाची दुहेरीत बाजी

पहिल्या तीन लढती जिंकल्यानंतरही भारतीय बॅडमिंटन खेळाडूंनी वर्चस्व कमी होऊ दिले नाही. एम. आर. अर्जुन-ध्रुव कपिला या जोडीने रोरी इस्टोन-ॲलेक्स ग्रीन या जोडीवर २१-१७, २१-१९ असा सहज विजय नोंदवला. भारतीय जोडीने ३५ मिनिटांमध्ये बाजी मारली.

किरण जॉर्जही जिंकला

अखेरच्या एकेरीच्या लढतीत किरण जॉर्ज यानेही यश मिळवले. चोलन कयान याच्यावर विजय मिळवताना किरण याने २१-१८, २१-१२ असे वर्चस्व कायम ठेवले. किरण याने ४२ मिनिटांमध्ये विजयाला गवसणी घातली.

अखेरची लढत इंडोनेशियाविरुद्ध

‘क’ गटातील अखेरचा साखळी फेरीचा सामना भारत-इंडोनेशिया व थायलंड-इंग्लंड यांच्यामध्ये होणार आहे. थायलंड-इंग्लंड यांच्यामधील लढतीच्या निकालाने बाद फेरीवर काही फरक पडणार नाही. भारत-इंडोनेशिया यांच्यामधील लढतीतील विजेता या गटातील पहिल्या क्रमांकाचा संघ ठरणार आहे. पराभूत संघाची दुसऱ्या स्थानावर घसरण होईल.