उमरान मलिक आता भारताची 'स्टेन गन', दक्षिण आफ्रिकेविरूद्ध धडाडणार

मुंबई : दक्षिण आफ्रिकेविरूद्धच्या टी 20 मालिकेसाठी भारतीय संघाची (Team India) घोषणा झाली आहे. निवडसमितीने या मालिकेसाठी सिनियर खेळाडूंना विश्रांती दिली असून त्यांच्या जागी आयपीएलमध्ये चमकदार कामगिरी करणाऱ्या खेळाडूंना संधी दिली आहे. सर्व क्रीडा रसिक ज्या खेळाडूंची संघात निवड व्हावी यासाठी गेल्या अनेक दिवसांपासून मागणी करत होते त्या जम्मू काश्मीरच्या उमरान मलिकची (Umran Malik) संघात वर्णी लागली आहे. त्यामुळे आता डेल स्टेनच्या छत्रछायेखाली तयार होत असलेला सनराईजर्स हैदराबादची ही स्टेन गन आता भारताची स्टेन गन होणार आहे.

सनराईजर्स हैदराबादचा वेगवान गोलंदाज उमारन मलिकच्या (Umran Malik) कामगिरीने सर्वजण चांगलेच प्रभावित झाले आहेत. उमरान आयपीएलमध्ये सातत्याने 150 किमी प्रती तास वेगाने गोलंदाजी करत होता. दिल्ली विरूद्धच्या सामन्यात तर त्याने 157 किमी प्रती तास वेगाने चेंडू टाकला होता. उमरान फक्त वेगात चेंडू टाकत नाही तर यंदाच्या हंगामात त्याने तब्बल 21 विकेट देखील घेतल्या आहेत. सध्या हंगामात सर्वात जास्त विकेट घेणाऱ्यांच्या यादीत तो चौथ्या स्थानावर आहे.

दक्षिण आफ्रिकेविरूद्धच्या पाच टी 20 सामन्यांच्या मालिकेसाठी भारतीय संघाची घोषणा झाली. अपेक्षेप्रमाणे भारतीय संघातील वरिष्ठ खेळाडूंना विश्रांती देण्यात आली असून नव्या दमाच्या खेळाडूंचा टी 20 संघात भरणा आहे. या संघाचे नेतृत्व केएल राहुल करणार असून यात ऋतुराज गायकवाड, इशान किशन, दीपक हुड्डा, श्रेयस अय्यर, ऋषभ पंत, दिनेश कार्तिक, हार्दिक पांड्या, व्यंकटेश अय्यर, युजवेंद्र चहल, कुलदीप यादव, अक्षर पटेल, रवी बिश्नोई, भुवनेश्वर कुमार कुमार, हर्षल पटेल, आवेश खान, अर्शदीप सिंग, उमरान मलिक यांचा समावेश आहे.

भारतीय कसोटी संघ पुढील प्रमाणे :

रोहित शर्मा, केएल राहुल, विराट कोहली, शुभमन गिल, श्रेयस अय्यर, हनुमा विराही, चेतेश्वर पुजारा, ऋषभ पंत, केएस भरत, रविंद्र जडेजा, आर. अश्विन, शार्दुल ठाकूर, मोहम्मद शमी, जसप्रीत बुमराह, मोहम्मद सिराज, उमेश यादव, प्रसिद्ध कृष्णा.