Vijay Hazare Trophy : मुंबईचा खेळ खल्लास! तमिळनाडूची थाटात उपांत्य फेरीत एन्ट्री

Vijay Hazare Trophy : भारतातील स्थानिक क्रिकेटमधील बलाढ्य संघ म्हणून ओळखल्या जाणाऱ्या मुंबई क्रिकेट संघाचे विजय हजारे एकदिवसीय करंडकातील आव्हान सोमवारी संपुष्टात आले. तमिळनाडू संघाने मुंबई संघावर ७ विकेट व ४० चेंडू राखून विजय मिळवला आणि उपांत्य फेरीत प्रवेश केला.

मुंबईकडून तमिळनाडू संघासमोर २२८ धावांचे आव्हान ठेवण्यात आले. तमिळनाडू संघाने अवघे तीन विकेट गमावत हे लक्ष्य ओलांडले. बाबा अपराजित (४५ धावा) व नारायण जगदीशन (२७ धावा) या सलामी जोडीने ५० धावांची भागीदारी करताना आश्‍वासक सुरुवात करून दिली. या दोघांसह निशीश राजगोपाल (१ धाव) हा फलंदाज बाद झाल्यानंतर तमिळनाडूची अवस्था ३ बाद १०३ धावा अशी झाली होती, पण बाबा इंद्रजीत (नाबाद १०३ धावा) व विजय शंकर (नाबाद ५१ धावा) या जोडीने नाबाद १२६ धावांची भागीदारी करताना तमिळनाडूच्या विजयावर शिक्कामोर्तब केले.

याआधी जय बिस्ता (३७ धावा), दिव्यांश सक्सेना (०), हार्दिक तामोरे (२४ धावा), अजिंक्य रहाणे (१ धाव), शम्स मुलानी (२७ धावा) या मुंबईकरांना अपयशाला सामोरे जावे लागले. अजिंक्यला या स्पर्धेमध्ये सूर गवसला नाही. प्रसाद पवारने ५९ धावांची; तर शिवम दुबेने ४५ धावांची खेळी केल्यामुळे मुंबईला २२७ धावांपर्यंत मजल मारता आली.

विजय हजारे करंडकाच्या उपांत्य फेरीच्या लढती निश्‍चित झाल्या आहेत. हरियाना-तमिळनाडू व राजस्थान-कर्नाटक यांच्यात या लढती होतील. १३ व १४ डिसेंबरला हे सामने होतील.