नवी दिल्ली : कर्णधारपदावरून पायउतार होऊनही विराट कोहलीने २०२१ च्या ‘डफ अँड फेल्‍प्स सेलिब्रिटी ब्रँड व्हॅल्युएशन’ अहवालामध्ये पाचव्यांदा सर्वांत मौल्यवान सेलिब्रिटी म्हणून बाजी मारली आहे. कोहलीचे ब्रँड मूल्य २०२० मध्ये २३७.७ दशलक्ष डॉलर्स इतके होते. त्यानंतर ते २०२१ मध्ये १८५.७ दशलक्ष डॉलर्सपर्यंत घसरले.
त्याच्यापाठोपाठ अभिनेता रणवीर सिंगचे ब्रँड मूल्य वाढले असून तो आता १५८.३ दशलक्ष डॉलर्स ब्रँड मूल्यासह तिसऱ्या क्रमांकावरून दुसऱ्या क्रमांकावर आला आहे; तर बॉलीवूडचा खिलाडी अभिनेता अक्षय कुमार १३९.६ दशलक्ष डॉलर्सच्या ब्रँड मूल्यासह तिसऱ्या क्रमांकावर आहे. नुकत्याच प्रदर्शित झालेल्या ट्रीपल आर चित्रपटातील अभिनेत्री आलिया भट्ट ६८.१ दशलक्ष डॉलर्स ब्रँड मूल्यासह चौथ्या क्रमांकावर आली आहे. त्यामुळे ती अव्वल १० मधील सर्वांत तरुण सेलिब्रिटी ठरली असून ती महिला बॉलीवूड कलाकारांमध्ये सर्वांत मौल्यवान ब्रँडदेखील आहे.
भारताचा माजी कर्णधार महेंद्रसिंग धोनी २०२१ मध्ये ६१.२ दशलक्ष डॉलर्स ब्रँड मूल्यासह पाचव्या क्रमांकावर आला आहे, परंतु २०२० मध्ये धोनीची ३६.३ दशलक्ष डॉलर्स इतकी असणाऱ्या ब्रँड मूल्यात गेल्या वर्षी मोठी वाढ झाली आहे. ‘‘धोनीच्या मागे अजूनही मोठ्या प्रमाणात फॉलोअर्सचा गराडा आहे. तसेच त्याने त्याची शुद्ध क्रिकेटपटूची प्रतिमा निवृत्तीनंतरही हुशारीने जपली आहे.’’ असे डफ अँड फेल्प्सने आपल्या अहवालात म्हटले आहे.
२०२१ मध्ये भारतातील अव्वल २० सेलिब्रिटींची एकूण ब्रँड व्हॅल्यू १.२ अब्ज डॉलर्स इतकी होती, जी गेल्या वर्षीच्या तुलनेत सुमारे १२.९ टक्क्यांनी वाढली आहे. बॅडमिंटनपटू पी. व्ही. सिंधू २०२१ मध्ये २२ दशलक्ष डॉलर्स ब्रँड मूल्यासह अव्वल २० गटामध्ये नव्याने सामील झाली आहे.
‘‘आम्ही व्यवसाय आणि ब्रँड्समध्ये डिजिटल एक्सीलरेशनच्या दुसऱ्या टप्प्यात आहोत. २०२१ च्या सेलिब्रिटींमध्ये, विराट ब्रँड व्हॅल्यू तक्त्यावर राज्य करत असताना रणवीर, आलिया आणि धोनी यांनीही प्रेक्षकांच्या पसंतीस उतरत ब्रँड व्हॅल्यूमध्ये चांगली उडी घेतली आहे,’’ असे डफ आणि फेल्प्सचे व्यवस्थापकीय संचालक अविरल जैन यांनी म्हटले आहे.
सर्वाधिक ब्रँड मूल्य असणारे सेलिब्रिटी
विराट कोहली : १८५.५ दशलक्ष डॉलर्स
रणवीर सिंग : १५८.३ दशलक्ष डॉलर्स
अक्षय कुमार : १३९.६ दशलक्ष डॉलर्स
आलिया भट्ट : ६८.१ दशलक्ष डॉलर्स
महेंद्रसिंग धोनी : ६१.१ दशलक्ष डॉलर्स
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.