VIDEO : पंतचा उतावळेपणा पाहून कोहलीही चिडला!

दक्षिण आफ्रिकेत कसोटी मालिका गमावल्यानंतर वनडेत टीम इंडियावर व्हाईट वॉशची नामुष्की ओढावली. भारतीय संघाने पहिल्या दोन वनडेतील पराभवानं मालिका आधीच गमावली होती. पण किमान अखेरचा वनडे सामना जिंकून टीम इंडिया व्हाईटवॉश टाळेल, असा विश्वास टीम इंडियाच्या प्रत्येक चाहत्याला होता. पण टीम इंडियानं इथंही घोर निराश केले. शिखर धवन आणि विराट कोहलीनं डावाला आकार दिला. पण त्यानंतर मध्यफळीतील फलंदाजांनी पुन्हा निराश केले. रिषभ पंत तर उतावळेपणाचा शिकार झाला.

शिखर धवन (Shikhar Dhavan) बाद झाल्यानंतर लेफ्ट राईट कॉम्बिनिशनसाठी पंतला (Rishabh Pant) पुन्हा बढती मिळाली. पण तो नावाला साजेसा खेळ करण्यात अपयशी ठरला. भारतीय संघाच्या (Team India) डावातील 23 व्या षटकातील दुसऱ्या चेंडूवर शिखर धवन (Shikhar Dhavan) बाद झाला. फेहलुकवायोच्या पाचव्या चेंडूवर विराट कोहलीनं (Virat Kohli) सिंगल काढून मैदानात आलेल्या पंतला स्टाईक दिले. कोणताही विचार न करता पंतने पुन्हा शॉट सिलेक्शनमध्ये चूक केली आणि झेलबाद होऊन परतला.

पहिल्याच बॉलला त्याने जो फटका खेळण्याचा प्रयत्न केला ते त्याच्यातील अपरिपक्वतेच दर्शन घडवणार होते. नॉन स्ट्राईकवर असलेल्या कोहलीलाही त्याचा हा फटका पाहून राग अनावर झाला. तो बाद होऊन तंबूत परतत असताना कोहलीने डोळे मोठे करून पंतकडे पाहताना दिसले. कोहलीची ही रिअ‍ॅक्शन सोशल मीडियावर व्हायरल होत आहे. जी भावना कोहलीच्या मनात आहे तिच भावना क्रिकेटचा सामना पाहणाऱ्या आणि प्रत्येक क्रिकेट चाहत्याच्या मनात असल्याच्या प्रतिक्रिया सोशल मीडियावर उमटत आहेत.

तिसऱ्या आणि अखेरच्या वनडे सामन्यात कोहलीच्या अर्धशतकाशिवाय शिखर धवन आणि दीपक चाहरने अर्धशतकी खेळी केली. पण भारतीय संघाला तरीही पराभवाचा सामना करावा लागला. न्यूझीलंडच्या मैदानात 2020 मध्ये भारतीय संघाला 3-0 असा पराभव स्विकारावा लागला होता. त्यानंतर पुन्हा भारतीय संघावर व्हाईटवॉशची नामुष्की ओढावली आहे. पंतशिवाय श्रेयस अय्यर आणि सुर्यकुमार यादवनं निराश केले. दोघांना चांगली सुरुवात मिळाली पण त्यांनी मोक्याच्या क्षणी विकेट फेकली. त्यानंतर दीपक चाहरने टीम इंडियाला शेवटपर्यंत सामन्यात ठेवले. पण तो बाद झाला आणि सामना भारताच्या हातून निसटला.