PKL 8 Points Table : Puneri Paltan तळाला, जाणून घ्या टॉपला कोण?

प्रो कबड्डीच्या आठव्या हंगामात सामन्यागणिक रंगत वाढत आहे. सोमवारी झालेल्या लढतीत बंगाल वॉरियर्सने (Bengal Warriors) पिंक पँथर्सला (Pink Panthers) 31-28 असे नमवले. दुसऱ्या सामन्यात तेलुगू टायटन्स (Telugu Titans) आणि पाटणा पायरेट्स (Patna Pirates) यांच्यातील रोमहर्षक लढतीत तेलुगू टायन्सने अवघ्या एका गुणाने बाजी मारली. शेवटच्या क्षणापर्यंत रंगतदार झालेल्या सामना 31-30 असा संपला. या सामन्यातील विजयानंतर बंगाल वॉरियर्स गुणतालिकेत 16 गुणांसह पाचव्या स्थानावर पोहचला. दुसऱ्या सामन्यात पराभूत झालेल्या पाटणा पायरट्स तिसऱ्या स्थानावर कायम आहे.

प्रो कबड्डीच्या आतापर्यंत झालेल्या लढतीत 6 पैकी 4 सामन्यातील विजयासह बंगळुरु बुल्सचा (Bengaluru Bulls) संघ 23 गुणांसह सर्वात अव्वल आहे. त्यांनी एक सामना गमावला असून एक सामना ड्रॉ खेळला आहे. त्यांच्या पाठोपाठ या यादीत दबंग दिल्लीचा (Dabang Delhi) नंबर लागतो. दिल्लीनं 5 पैकी 3 सामन्यातील विजयासह दोन सामने ड्रॉ खेळले आहेत. त्यांच्या पदरी एकही पराभव आलेला नाही. ते 21 गुणांसह दुसऱ्या स्थानावर आहेत. पाटणा पायरेट्सने (Patna Pirates) 5 पैकी 4 सामने जिंकले असून एका पराभवसह ते 21 गुण मिळवून तिसऱ्या स्थानावर आहेत.

सलामीच्या लढतीत धमाकेदार विजय मिळवणारा यू मुम्बा (U Mumba) चौथ्या स्थानावर घसरलाय. त्यांनी 5 लढतीतील 2 सामने जिंकले आहेत तर दोन सामने बरोबरीत सोडवले आहेत. त्यांनी एका पराभवाचाही समावेश आहे. बंगाल वॉरियर्सनं (Bengal Warriors) 6 पैकी 3 विजय आणि 3 पराभवासह 16 गुण कमावले आहेत. ते पाचव्या स्थानावर आहेत. तमिळ थलायवाजने (Tamil Thalaivas) आतापर्यंत खेळलेल्या 5 सामन्यात एक सामना जिंकला असून एका सामन्यात त्यांना पराभवाचा सामना करावा लागला आहे. तीन सामने बरोबरीत सुटल्यामुळे त्यांच्या खात्यात 14 गुण आहेत.

गुजरात जायएंट्स (Gujarat Giants), यूपी योद्धा (UP Yoddha), पिंक पँथर्स (Pink Panthers), हरियाणा स्टिलर्स(Haryana Steelers), तेलुगू टायटन्स (Telugu Titans) आणि पुणेरी पलटन (Puneri Paltan) यांनी प्रत्येकी पाच पाच सामने खेळले आहेत. अनुक्रमे 13,13, 12,12 आणि 9,5 असे गुण मिळवले आहेत. गुणतालिकेत तळाला असलेल्या पुणेरी पलटनने एकमेव विजय मिळवला असून चार सामन्यात त्यांना पराभवाचा सामना करावा लागला आहे.