Vinesh Phogat : आम्ही खेळाडू आहोत, रोबोट नव्हे; विनेश फोगाट

नवी दिल्ली : भारताची महिला कुस्तीपटू विनेश फोगाट हिने बेलग्रेड येथे सुरू असलेल्या जागतिक कुस्ती अजिंक्यपद स्पर्धेमध्ये ब्राँझपदक जिंकले. प्रतिष्ठेच्या स्पर्धेमध्ये दोन पदके जिंकणारी ती भारताची पहिली महिला कुस्तीपटू ठरली. या स्पर्धेदरम्यान सामाजिक माध्यमांवर तिच्यावर टीका करण्यात आली होती. हाच धागा पकडून ती म्हणाली, ‘‘खेळाडूही मानव असतात. स्पर्धेची घोषणा झाली म्हणजे आम्ही रोबोटप्रमाणे कामाला लागायचे असे होत नाही. इतर देशांमध्येही ही संस्कृती नसेल.’’ आपल्या भारतामध्ये घरी बसून वक्तव्य करणाऱ्या तज्ज्ञांची कमी नाही, अशा शब्दांत विनेशने टीकाकारांना उत्तर दिले आहे.

‘‘भारतामध्ये असे बरेच लोक आहेत जे स्वतःला क्रीडा क्षेत्रातील तज्ज्ञ मानतात. खेळाडूंनी त्यांचे करिअर कधी थांबवावे किंवा संपवावे, त्यांनी कधी खेळावे आणि खेळू नये यावर लोक भाष्य करू शकतात. तेव्हा ते खूप निराशाजनक असते,’’ अशी निराशा पुढे तिने व्यक्त केली.

संस्कृती बदलण्याचा प्रयत्न करू

ती सांगते की, ‘‘ज्यांच्याकडे कठीण प्रवासात वारंवार स्वतःला सामोरे जाण्याची आणि लोकांची भीती न बाळगता स्वप्न पूर्ण करण्याची हिंमत आहे, अशा माझ्या सर्व सहकारी खेळाडूंना सांगू इच्छिते की, आम्ही सर्व एकाच पृष्ठावर आहोत. अशी आशा आहे की, एक दिवस आपल्या सातत्यपूर्ण प्रयत्नांनी, धैर्याने आणि समर्पणाने ही संस्कृती बदलण्याचा प्रयत्न करू.’’